మన్ప్రీత్ సింగ్ నాయకత్వంలో భారత పురుషుల హాకీ జట్టు.. టోక్యో ఒలింపిక్స్లో కచ్చితంగా పతకం సాధిస్తుందని ఆశాభావం వ్యక్తం చేశాడు మాజీ హాకీ కెప్టెన్ సర్దార్ సింగ్. 1980 మాస్కో ఒలింపిక్స్లో భారత హాకీ జట్టు చివరిసారిగా బంగారు పతకాన్ని సాధించింది. అప్పటి నుంచి 8 విశ్వక్రీడల్లో పాల్గొన్నా.. పతకం సాధించడంలో 'మెన్ ఇన్ బ్లూ' విఫలమైంది.
"314 అంతర్జాతీయ మ్యాచ్లు ఆడినా.. ఒలింపిక్స్లో పతకాన్ని సాధించలేకపోయినందుకు చింతిస్తున్నాం. కానీ, ప్రస్తుత జట్టు గతేడాది నుంచి ప్రదర్శనలో బలంగా ఎదుగుతోంది. ఈ ఏడాది ప్రారంభంలో అంతర్జాతీయ హాకీ సమాఖ్య నిర్వహించిన లీగ్లో ఆడిన విధానం చూస్తే.. టోక్యో ఒలింపిక్స్లో పతకాన్ని సాధించగలరన్న నమ్మకం మరింత బలపడింది.
-సర్దార్ సింగ్, భారత పురుషుల జట్టు మాజీ కెప్టెన్
ప్రపంచవ్యాప్తంగా కరోనా వ్యాప్తిని దృష్టిలో ఉంచుకొని టోక్యో ఒలింపిక్స్ను 2021 వేసవికి వాయిదా వేశారు. దీంతో ప్రాక్టీసు చేయడానికి అదనపు సమయం లభిస్తుందని సర్దార్ సింగ్ అభిప్రాయపడ్డాడు.
"వచ్చే ఏడాది భారత హాకీ జట్టుకు చాలా క్లిష్టమైనది. కొత్త ప్రతిభను పెంపొందిచుకోవడానికి వారికి సమయం ఉంది. రాజ్ కుమార్, దిల్ప్రీత్, వివేక్ సాగర్, గుర్సాహిబ్ వంటి యువ ఆటగాళ్ల ప్రయత్నం గొప్పగా ఉంది. గత రెండు, మూడేళ్ల నాటి పరిస్థితితో పోల్చుకుంటే ప్రస్తుతం కొంచెం మెరుగ్గా ఉన్నామని భావిస్తున్నా" అని సర్దార్ సింగ్ వెల్లడించాడు.
