దిగ్గజ ఫుట్బాలర్ పీలే రికార్డును తిరగరాశాడు బార్సిలోనా స్టార్ ఫుట్బాల్ ప్లేయర్ లియోనల్ మెస్సీ. ఒకే క్లబ్ తరపున అత్యధిక గోల్స్(644) చేసిన ఆటగాడిగా పీలేను వెనక్కినెట్టాడు. సాన్టోస్ క్లబ్ తరపున గతంలో ఆడిన పీలే చేసిన 643 గోల్సే ఇప్పటివరకు అత్యధికం. ఈ రికార్డు సాధించిన అనంతరం తన ఇన్స్టా ఖాతాలో ఓ ఆసక్తికర పోస్ట్ పెట్టాడు మెస్సీ.
"ఫుట్బాల్ మొదలుపెట్టిన సమయంలో నేను ఒక్క రికార్డు కూడా సాధిస్తానని అనుకోలేదు. ఈరోజు సాధించిన రికార్డు గురించి అయితే అస్సలు ఊహించలేదు. నా సహచరులు, కుటుంబం, స్నేహితులు, ఇలా చాలా ఏళ్లుగా నాకు మద్దతుగా నిలుస్తున్న వారందరికీ ధన్యవాదాలు."
-మెస్సీ, ఫుట్బాల్ ఆటగాడు
మరో రికార్డుపై కన్ను
బ్రెజిల్ ఆటగాడు పీలే తన దేశం తరఫున 77 గోల్స్ చేశాడు. ఇదే ఇప్పటివరకు ఓ దక్షిణా అమెరికా ఆటగాడి అత్యధికం. అర్జెంటీనా ఫుట్బాలర్ మెస్సీ ప్రస్తుతం 71 గోల్స్తో ఉన్నాడు. త్వరలోనే ఈ రికార్డును మెస్సీ తిరగరాసే అవకాశం ఉంది.
