సౌథాంప్టన్ వేదికగా టీమ్ఇండియాతో జరుగుతోన్న డబ్ల్యూటీసీ ఫైనల్ మ్యాచ్లో న్యూజిలాండ్ పట్టు బిగిస్తోంది. మూడో రోజు ఆట ముగిసే సమయానికి ఆ జట్టు 2 వికెట్ల నష్టానికి 101 పరుగులు చేసింది. కాన్వే(54) అర్ధ శతకంతో రాణించాడు. ప్రస్తుతం క్రీజులో.. కెప్టెన్ విలియమ్సన్(12*), రాస్ టేలర్ (0*) ఉన్నారు. భారత బౌలర్లలో అశ్విన్, ఇషాంత్ చెరో వికెట్ తీశారు.
తొలి ఇన్నింగ్స్లో బరిలోకి దిగిన కేన్ సేనకు శుభారంభం లభించింది. తొలి వికెట్కు ఓపెనర్లు లాథమ్-కాన్వే జోడీ 70 పరుగులు జోడించింది. ఓ వైపు భారత పేసర్లు కట్టుదిట్టమైన బంతులేస్తున్నా ఈ ద్వయం ఓపికతో బ్యాటింగ్ చేసింది. ప్రమాదకరంగా మారుతున్న ఈ జంటను అశ్విన్ విడగొట్టాడు. కెప్టెన్ విరాట్ కోహ్లీ పట్టిన ఓ అద్భుతమైన క్యాచ్కు లాథమ్ పెవిలియన్ చేరాడు. అనంతరం క్రీజులోకి వచ్చిన విలియమ్సన్.. నిలకడగా ఆడి కాన్వేకు సహకారం అందించాడు. ఈ క్రమంలో అర్థ శతకం పూర్తి చేసుకొని ఆత్మవిశ్వాసంగా కనపడిన కాన్వే.. 49వ ఓవర్లో ఇషాంత్ బౌలింగ్లో ఔట్ అయ్యాడు. దాంతో న్యూజిలాండ్ 101 పరుగుల వద్ద రెండో వికెట్ కోల్పోయింది. అదే సమయంలో వెలుతురులేమి కారణంగా అంపైర్లు ఆటను నిలిపివేశారు. క్రీజులో కేన్, టేలర్ ఉన్నారు. వర్షం కారణంగా తొలి రోజు తుడిచిపెట్టుకుపోయిన మ్యాచ్.. రెండో రోజూ వెలుతురులేమీ కారణంగా పలుమార్లు ఆగిపోయింది.
భారత్ టపటపా..
146/3తో మూడో రోజు ఆట ప్రారంభించిన టీమ్ఇండియా.. కాసేపటికే కెప్టెన్ కోహ్లీ వికెట్ను కోల్పోయింది. అద్భుతమైన బంతితో జేమీసన్.. విరాట్ను ఎల్బీగా పెవిలియన్ చేర్చాడు. తర్వాత క్రీజులోకి వచ్చిన రిషభ్ పంత్ కూడా ఆకట్టుకోలేకపోయాడు. 22 బంతులాడి కేవలం 4 పరుగులే చేసిన పంత్ అనవసరమైన షాట్ ఆడి జేమీసన్ బౌలింగ్లో ఔట్ అయ్యాడు. మరో బ్యాట్స్మన్ అజింక్య రహానె.. సంయమనం ప్రదర్శించాడు. అర్ధ సెంచరీకి చేరువైన అతడిని వాగ్నర్ బోల్తా కొట్టించాడు. అనంతరం బ్యాటింగ్కు దిగిన అశ్విన్(27 బంతుల్లో 22 పరుగులు) ధాటిగా ఆడే ప్రయత్నం చేసి చివరికి స్లిప్స్లో దొరికిపోయాడు.
లంచ్ అనంతరం భారత్ 6 పరుగుల తేడాతో 3 వికెట్లను కోల్పోయింది. వరుస బంతుల్లో జేమీసన్.. ఇషాంత్, బుమ్రా వికెట్లను తీసుకున్నాడు. ఇషాంత్ను కీపర్ క్యాచ్గా వెనక్కి పంపగా.. బుమ్రాను వికెట్ల ముందు దొరకబుచ్చుకున్నాడు. దీంతో డబ్ల్యూటీసీ ఫైనల్ ఈవెంట్లో 5 వికెట్లు తీసిన తొలి బౌలర్గా జేమీసన్ రికార్డు సృష్టించాడు. తర్వాత బౌల్ట్ బౌలింగ్లో జడేజా ఔటయ్యాడు.
ఇదీ చదవండి: Tokyo Olympics: అథ్లెట్లకు బీసీసీఐ విరాళం.. ఎంతంటే?
