Women's Day 2022: ఎన్నో ఆంక్షలు. మరెన్నో కట్టుబాట్లు. అన్నింటినీ అధిగమించి.. క్రీడా ప్రపంచంలో తమకంటూ ప్రత్యేక గుర్తింపు తెచ్చుకున్న క్రీడామణులు ఎందరో.. మరి ప్రపంచ మహిళాదినోత్సవం( మార్చి 8)వేళ జీవనసమరంలో జయించి.. కోట్లమంది యువతలో స్ఫూర్తిని నింపిన వారి గురించి తెలుసుకుందామా..?
క్రికెట్ ప్రపంచంలో ఎదురులేని శక్తిగా..
భారత మహిళా క్రికెట్లోనే గొప్ప క్రికెటర్ మిథాలీ రాజ్. రెండు దశాబ్దాలుగా అంతర్జాతీయ క్రికెట్ ఆడుతున్న ఆమె ఎన్నో ఘనతల్ని అందుకున్నారు. 39 ఏళ్ల ఈ బ్యాటర్ వన్డే ప్రపంచకప్లో రెండు సార్లు భారత్ను ఫైనల్స్కు తీసుకెళ్లారు. ఈ ఘనత సాధించిన తొలి కెప్టెన్గా రికార్డు నెలకొల్పారు.
అంతర్జాతీయ మహిళల క్రికెట్లో 7,000 పరుగులు చేసిన మిథాలీ.. అత్యధిక పరుగులు చేసిన క్రికెటర్గా రికార్డు సృష్టించారు. దీంతోపాటు వన్డేల్లో వరుసగా ఏడు అర్థ శతకాలు చేసిన బ్యాటర్గా ఘనత వహించారు. భారత్ తరఫున టీ20ల్లో 2,000 పరుగులు చేసిన మిథాలీ.. అంతర్జాతీయంగాను ఈ రికార్డును సృష్టించిన తొలి క్రికెటర్గా ఘనత సాధించారు. వన్డేల్లో దృష్టి సారించేందుకు మిథాలీ 2019లో టీ20ల నుంచి తప్పుకున్నారు.
ఎన్నో రికార్డులు సృష్టించిన మిథాలీ రాజ్ భారత ప్రభుత్వం నుంచి అనేక అవార్డులను పొందారు. 2003లో అర్జున, 2015లో పద్మశ్రీ, 2017లో విస్డెన్ వుమెన్ క్రికెటర్ అవార్డు, 2021లో మేజర్ ధ్యాన్చంద్ ఖేల్రత్న ఆవార్డులు ఆమెను వరించాయి.
వరుసగా రెండుసార్లు ఒలింపిక్స్లో..
భారతదేశంలోని ఫిట్నెస్ గల అథ్లెట్లలో పీవీ సింధు ఒకరు. భారత త్రివర్ణ పతాకాన్ని ఒలింపిక్స్ సహా అనేక ఈవెంట్లలో రెపరెపలాడించారు. భారత్ తరఫున బ్యాడ్మింటన్ వరల్డ్ ఛాంపియన్షిప్తో పాటు ఒలింపిక్స్లో వరుసగా రెండు సార్లు పతకాలు సాధించిన అథ్లెట్గా రికార్డు సృష్టించారు. దీంతో పాటు 2018లో జరిగిన కామన్వెల్త్, ఆసియా గేమ్స్లో రెండు రజత పతకాలు, ఉబర్ కప్లో రెండు కాంస్య పతకాల్ని సాధించారు.
భారత మూడో అత్యుత్తమ పౌర పురస్కారం పద్మ భూషణ్తో పాటు పద్మశ్రీ, అర్జున, మేజర్ ధ్యాన్చంద్ ఖేల్రత్న అవార్డులను కైవసం చేసుకున్నారు
బాక్సింగ్లో ఆల్వేస్ కింగ్..
భారత్ బాక్సింగ్లోకి ఆలస్యంగా అడుగుపెట్టినా గెలవాలనే తపనతో తక్కువ సమయంలోనే ఉన్నత శిఖరాలను అందుకున్నారు మేరీకోమ్. 2001లో ప్రపంచ బాక్సింగ్ ఛాంపియన్షిప్స్లో తొలిసారి పాల్గొన్న ఆమె రజత పతకాన్ని సాధించారు.
ఆరు ప్రపంచ ఛాంపయన్షిప్స్ సాధించిన ఆమె 2002లో తొలి బంగారు పతకాన్ని గెలుపొందారు. ఐర్లాండ్కు చెందిన కేటీ టేలర్ ఐదు సార్లు ప్రపంచకప్ పొందిన రికార్డును తిరగరాసిన ఆమె.. చరిత్రలోనే అత్యంత విజయవంతమైన బాక్సర్గా రికార్డు సృష్టించారు. 2012 లండన్ ఒలింపిక్స్లో కాంస్యం గెలుచుకున్న ఆమె మొత్తం 8 పతకాలను సాధించారు.
దీంతో బాక్సింగ్ చరిత్రలో పురుషుల, మహిళల కేటగిరీలో ఎవరు సాధించని రికార్డును సృష్టించారు. 2014 ఆసియా గేమ్స్, కామన్వెల్త్ గేమ్స్లో బంగారు పతకాలు సాధించిన ఆమె ఈ ఘనత వహించిన తొలి భారత బాక్సర్గా రికార్డు సృష్టించారు. ఆసియా గేమ్స్లో మేరీకోమ్ ఐదుసార్లు గెలిచారు.
పారాలింపిక్స్లో అత్యుత్తమ అథ్లెట్..
అవని లేఖరా భారత పారాలింపిక్స్లో అత్యుత్తమ అథ్లెట్. అనేక సందర్భాల్లో దేశం గర్వపడేలా చేశారు అవని లేఖరా. మహిళల 10 మీటర్ల ఏయిర్ రైఫిల్ విభాగంలో ప్రపంచంలోనే రెండో స్థానాన్ని సాధించారు. 2020 టోక్యో పారాలింపిక్స్ 10 మీటర్ల విభాగంలో బంగారు పతకం, 50 మీటర్ల విభాగంలో కాంస్య పతకాన్ని గెలుచుకున్నారు.
భారత తరఫున పారాలింపిక్లో గోల్డ్ మెడల్ సాధించిన మహిళగా రికార్డు సృష్టించారు. 2020 సమ్మర్ పారాలింపిక్స్లో 249.6 పాయింట్లతో బంగారు పతకాన్ని గెలిచారు. దీంతో పారాలింపిక్ రికార్డ్, ప్రపంచ రికార్డులను సమం చేశారు. 2021లో ఖేల్రత్న, 2022లో పద్మశ్రీ పురస్కారాలను అందుకున్నారు.
మణిపుర్ మణిహారం..
మణిపుర్కు చెందిన సైకోమ్ మీరాబాయి చాను రజతం గెలవడం వల్ల భారత్ టోక్యో ఒలింపిక్స్ను ప్రారంభించింది. 49 కేజీల లిఫ్టింగ్ విభాగంలో ఈ పతకాన్ని గెలుచుకున్నారు. వరల్డ్ ఛాంపియన్షిప్, కామన్వెల్త్లో బంగారు పతకాలు గెలిచినా..రియో ఒలింపిక్స్లో నిరాశపరిచారు.
28ఏళ్ల చాను 2014లో కామన్వెల్త్లో 48కేజీల విభాగంలో రజతాన్ని గెలిచారు. 2016 రియో ఒలింపిక్స్లో నిరాశపరిచిన చాను 2017 ప్రపంచ ఛాంపియన్షిప్ని గెలిచి తిరిగి పుంజుకున్నారు. ఒలింపిక్స్లో వేయిట్ లిఫ్టింగ్ విభాగంలో రజత పతకాన్ని సాధించిన మహిళగా రికార్డు సృష్టించారు. కరణం మల్లీశ్వరి తర్వాత ఈ ఘనత సాధించిన రెండో మహిళగా రికార్డు సృష్టించారు. 2000 సిడ్నీ ఒలింపిక్స్లో కరణం మల్లీశ్వరి కాంస్యం గెలిచింది.
భారత్కు ఎన్నో విజయాలను అందించిన ఈ క్రీడాకారులు ఎందరో మహిళలకు ఆదర్శంగా నిలుస్తున్నారు. మహిళలు ఏదైనా సాధించగలరన్న ఆత్వవిశ్వాసాన్ని నింపుతున్నారు.
ఇదీ చదవండి: యువ ప్లేయర్ల కోసం మేరీకోమ్ త్యాగం
