బీసీసీఐ ఆధ్వర్యంలో తొలిసారి నిర్వహించనున్న మహిళల ప్రీమియర్‌ లీగ్ (డబ్ల్యూపీఎల్‌) టి20 టోర్నీ క్రికెటర్ల వేలం కార్యక్రమం మరి కొన్ని గంటల్లో ప్రారంభం కానుంది. మధ్యాహ్నం 2.30 గంటలకు మొదలయ్యే అవకాశముంది. ఈ కార్యక్రమాన్ని స్పోర్ట్స్‌ 18 ఛానల్, జియో సినిమా యాప్‌లో ప్రత్యక్ష ప్రసారం చేస్తారు. ఈ నేపథ్యంలో ఈ వేలం గురించి కొన్ని విశేషాలు మీకోసం..
- ఈ మహిళా లీగ్ వేలం మల్లిక సాగర్‌ నేతృత్వంలో జరగనుండటం విశేషం. ఈమె 2021లో ప్రొ కబడ్డీ లీగ్ వేలం కార్యక్రమాన్ని నిర్వహించారు.
- స్టార్‌ బ్యాటర్లు స్మృతి మంధాన, హర్మన్‌ప్రీత్‌ కౌర్‌, యువ సంచలనం షెఫాలీ వర్మ వేలంలో ప్రధాన ఆకర్షణగా నిలవనున్నారు. వీళ్లకు కోటి రూపాయలకు పైగా ధర పలుకుతుందని భావిస్తున్నారు.
- వికెట్‌ కీపర్‌ బ్యాటర్‌ రిచా ఘోష్‌, సీమర్‌ రేణుక ఠాకుర్‌ కూడా ఆసక్తి రేపుతున్నారు. రాజేశ్వర్‌ గైక్వాడ్‌, రిచా యాదవ్‌, సీమర్లు మేఘన సింగ్‌, శిఖ పాండేల కోసం కూడా జట్లు గట్టిగా పోటీ పడే అవకాశముంది.
- అండర్‌-19 ప్రపంచకప్‌ గెలిచిన జట్టులోని సభ్యులు శ్వేత సెహ్రావత్‌, పర్శవి చోప్రా, మన్నత్‌ కశ్యప్‌, అర్చన దేవి, తితాస్‌ సాధు కూడా ఫ్రాంఛైజీలను ఆకర్షించవచ్చు.
- అలీసా హేలీ, బేత్‌ మూనీ, ఎలిస్‌ పెర్రీ, మెగాన్‌ షట్‌ (ఆస్ట్రేలియా).. నాట్‌ సీవర్‌ (ఇంగ్లాండ్‌), డాటిన్‌ (వెస్టిండీస్‌) వంటి విదేశీ స్టార్లకు కూడా భారీ ధర పలుకుతుందని అంచనా.
- ఐదు ఫ్రాంఛైజీలు ముంబయి ఇండియన్స్‌, దిల్లీ క్యాపిటల్స్‌, ఆర్సీబీ, గుజరాత్‌ టైటాన్స్‌, యూపీ వారియర్స్‌ ఈ లీగ్లో పాల్గొననున్నాయి.
- మొత్తంగా 409 మందితో కూడిన క్రికెటర్ల జాబితాలో 90 మంది కోసం ఈ ఫ్రాంచైజీలు పోటీపడతాయి. ఈ ఆటగాళ్లలో 246 మంది భారత క్రికెటర్లు, 163 మంది విదేశీ క్రికెటర్లు వేలంలో అదృష్టాన్ని పరీక్షించుకోనున్నారు.
- ప్రతి జట్టు గరిష్టంగా రూ.12 కోట్లు ఖర్చు చేయొచ్చు. ఆరుగురు విదేశీ ఆటగాళ్లు సహా 18 మందిని కొనుక్కోవచ్చు. కనీసం 15 మందిని తీసుకోవాలి.
- క్రికెటర్ల కనీస ధర రూ.10 లక్షలతో మొదలవుతుంది. అత్యధిక కనీస ధర రూ.50 లక్షలు. వీటితో పాటు రూ.20 లక్షలు, రూ.30 లక్షలు, రూ.40 లక్షల విభాగాలు కూడా ఉన్నాయి.
- ఇకపోతే ఈ డబ్ల్యూపీఎల్‌ మార్చి 4 నుంచి 26 వరకు ముంబయిలో జరగనుంది.
ఇదీ చూడండి: అద్భుతం.. ఇలాంటి క్యాచ్ ఎప్పుడైనా చూశారా?
