Dawid Malan: ఇంగ్లాండ్ వేదికగా జరుగుతున్న హండ్రెడ్‌ టోర్నమెంట్‌లో బ్యాటర్లు రెచ్చిపోతున్నారు. 100 బంతుల్లో ముగిసే మ్యాచ్‌ అయినందున అభిమానులు కూడా ఆసక్తి చూపిస్తున్నారు. ఈ నేపథ్యంలో బ్యాటర్లు.. సిక్సర్లు, బౌండరీలతో మైదానాలను హోరెత్తిస్తున్నారు. తాజాగా మాంచెస్టర్‌ ఒరిజినల్స్‌ జట్టుతో జరిగిన మ్యాచ్‌లో ట్రెంట్‌ రాకెట్స్‌ బ్యాటర్ డేవిడ్ మలాన్ సూపర్‌ ఇన్నింగ్స్‌తో ఆకట్టుకున్నాడు.
రెండు పరుగుల తేడాతో సెంచరీ మిస్ అయినా.. నాటౌట్‌గా నిలిచి జట్టును విజయతీరాలకు చేర్చాడు మలాన్. 44 బంతుల్లో 98 పరుగులు చేసిన అతడి ఇన్నింగ్స్‌లో 3 ఫోర్లు, 9 సిక్సర్లు ఉండడం విశేషం.
మ్యాచ్‌లో తొలుత బ్యాటింగ్‌ చేసిన మాంచెస్టర్‌ ఒరిజినల్స్‌ 100 బంతుల్లో 3 వికెట్ల నష్టానికి 189 పరుగులు చేసింది. బ్యాటర్లు సాల్ట్‌ 70 పరుగులు చేయగా, జాస్‌ బట్లర్‌ 41 పరుగులు సాధించాడు. చివర్లో స్టబ్స్‌ 10 బంతుల్లో 4 సిక్సర్లతో 27 పరుగులు చేశాడు. అనంతరం ట్రెంట్‌ రాకెట్స్‌ జట్టు 94 బంతుల్లో రెండు వికెట్లు మాత్రమే కోల్పోయి విజయం సాధించింది.
ఇవీ చదవండి: ప్రధాని మోదీ ఇచ్చిన ప్రేరణతోనే రెజ్లింగ్లో పతకం గెలిచా
కరోనా వ్యాక్సిన్ వేసుకోని జకోవిచ్ యూఎస్ ఓపెన్లో ఆడనున్నాడా
