21వ శతాబ్దానికి సుదీర్ఘ ఫార్మాట్లో గొప్ప బ్యాట్స్మన్(greatest Test batsman)గా సచిన్ తెందుల్కర్(Sachin Tendulkar) నిలిచాడు. దీనిపై నిర్వహించిన ఓ సర్వేలో లిటిల్ మాస్టర్కే ఎక్కువ ఓట్లు పోలయ్యాయి. ఇందులో మాస్టర్ బ్లాస్టర్కు పోటీగా శ్రీలంక మాజీ కెప్టెన్ కుమార సంగక్కర నిలిచాడు. అయినా చివరకు తెందుల్కర్నే విజయం వరించింది.
"ఇది చాలా కఠినమైన విషయం. టెస్టుల్లో కుమార సంగక్కర, సచిన్ తెందుల్కర్ ఇద్దరూ ఐకాన్లుగానే పేరు పొందారు. కానీ, 21వ శతాబ్దపు గొప్ప బ్యాట్స్మన్గా నేను మాత్రం సచిన్కే ఓటు వేస్తాను."
-సునీల్ గావస్కర్, భారత క్రికెట్ దిగ్గజం.
టెస్ట్ల్లో తెందుల్కర్ మొత్తం 15,921 పరుగులు సాధించాడు. ఇందులో 51 సెంచరీలు ఉన్నాయి. రన్స్తో పాటు శతకాల పరంగా సచిన్ ఎవరికీ అందనంత ఎత్తులో ఉన్నాడు. పరుగుల విషయంలో అతనికి చేరువలో ఆసీస్ మాజీ కెప్టెన్ రికీ పాంటింగ్ దగ్గర్లో ఉన్నాడు. తెందుల్కర్ కంటే 2,543 పరుగులు తక్కువగా నమోదు చేశాడు. ఇక సెంచరీల విషయానికొస్తే దక్షిణాఫ్రికా మాజీ ఆల్రౌండర్ జాక్వస్ కలిస్.. సచిన్కు చేరువలో ఉన్నాడు. అతడు టెస్టుల్లో 45 శతకాలు బాదాడు.
కుమార సంగక్కర 38 సెంచరీల సాయంతో 12,400 రన్స్ చేశాడు. అత్యధిక పరుగుల జాబితాలో ఆరో స్థానంలో ఉన్నాడు. ఈ పోలింగ్లో గావస్కర్తో పాటు వీవీఎస్ లక్ష్మణ్, ఇర్ఫాన్ పఠాన్, ఆకాశ్ చోప్రా.. తదితరులు ఉన్నారు.
16 ఏళ్ల ప్రాయంలో ఆటలోకి అడుగుపెట్టిన సచిన్.. ప్రపంచ క్రికెట్పై తనదైన ముద్ర వేశాడు. విస్డెన్ క్రికెటర్స్ అల్మానాక్ 150వ వార్షికోత్సవం సందర్భంగా ప్రకటించిన ప్రపంచ ఆల్టైమ్ XIలో చోటు సంపాదించిన ఏకైక భారత ఆటగాడు సచిన్.
ఇక 2002లో విస్డెన్ క్రికెటర్స్ అల్మానాక్ ప్రకటించిన ర్యాంకుల్లో.. ఆల్టైమ్ గొప్ప టెస్ట్ బ్యాట్స్మన్ల జాబితాలో డాన్ బ్రాడ్మన్ తర్వాత తెందుల్కర్ పేరును ప్రకటించారు. వన్డేల్లో వివ్ రిచర్డ్స్ తర్వాత సచిన్ పేరును పేర్కొన్నారు.
ఇదీ చదవండి: 10 Years Of Kohli: కోహ్లీకే ఆ టెస్టు రికార్డులు సాధ్యం
