RR vs RCB: ఇండియన్ ప్రీమియర్ లీగ్లో మంగళవారం మరో ఆసక్తికర పోరు జరగనుంది. దూకుడుగా ఆడుతూ విజయాలు సాధిస్తున్న రాజస్థాన్ రాయల్స్.. రాయల్ ఛాలెంజర్స్ బెంగళూరు మధ్య రాత్రి 7.30 గంటలకు మ్యాచ్ జరగనుంది. ముంబయి వాంఖడే స్టేడియం వేదిక. రాయల్స్ గత మ్యాచ్లో ముంబయిపై 23 పరుగుల తేడాతో గెలిచింది. తమ చివరి మ్యాచ్లో కోల్కతాపై 3 వికెట్ల తేడాతో విజయం సాధించింది ఆర్సీబీ. రాజస్థాన్ రాయల్స్ అన్ని విభాగాల్లో బలంగా కనిపిస్తుంది. బ్యాటింగ్లో భారీ స్కోరు చేస్తూ.. ప్రత్యర్థిని ఉక్కిరిబిక్కిరి చేస్తోంది. బెంగళూరుకు మాత్రం.. ఆ జట్టు స్టార్ ప్లేయర్ గ్లెన్ మాక్స్వెల్ లేకపోవడం లోటుగా కనిపిస్తుంది. మాక్సీ.. ఈ మ్యాచ్కు కూడా అందుబాటులో ఉండట్లేదని యాజమాన్యం తెలిపింది. ఆస్ట్రేలియా కాంట్రాక్ట్ క్రికెటర్లు ఎవరూ ఏప్రిల్ 6 లోపు ఐపీఎల్లో ఆడకూడదని క్రికెట్ ఆస్ట్రేలియా ముందే స్పష్టం చేసింది. దీంతో.. మాక్సీ ఆర్సీబీ క్యాంప్లో చేరినా మ్యాచ్కు దూరంగా ఉండనున్నాడు. అతడు ఏప్రిల్ 9న ముంబయితో మ్యాచ్కు అందుబాటులోకి రానున్నట్లు తెలుస్తోంది. ఆర్సీబీ పేసర్ జోష్ హేజిల్ వుడ్.. ఏప్రిల్ 12న చెన్నైతో మ్యాచ్ సమయానికి అందుబాటులో ఉంటాడని తెలిపింది యాజమాన్యం.
ముంబయితో మ్యాచ్లో సెంచరీ చేసిన జోస్ బట్లర్, యశస్వి జైస్వాల్తో రాజస్థాన్ ఓపెనింగ్ బలంగా ఉంది. ఆ తర్వాత వచ్చే దేవ్దత్ పడిక్కల్, కెప్టెన్ శాంసన్ కూడా మంచి ఫామ్లో ఉన్నారు. హెట్మయర్ ఆఖర్లో విధ్వంసక ఇన్నింగ్స్లతో చెలరేగిపోతున్నాడు. వీరిని ఆపడం బెంగళూరుకు కష్టమనే చెప్పొచ్చు. ట్రెంట్ బౌల్ట్, ప్రసిద్ధ్ కృష్ణ, నవ్దీప్ సైనీలతో పేస్ విభాగం కూడా దుర్బేధ్యంగా ఉంది. గత మ్యాచ్ హీరోలు అశ్విన్, చాహల్ తిప్పేందుకు సిద్ధంగా ఉన్నారు. వీరందరితో రాయల్స్ బలోపేతంగా కనిపిస్తోంది.
మరోవైపు.. రాయల్ ఛాలెంజర్స్ బెంగళూరులో నిలకడ లోపించింది. ఆ జట్టు బౌలింగ్లో ఎక్కువగా లంక స్పిన్నర్ వనిందు హసరంగపైనే నమ్మకం పెట్టుకుంది. పేసర్లలో సిరాజ్ మినహా.. పెద్దగా అంతర్జాతీయ అనుభవం లేని ఆకాశ్ దీప్, డేవిడ్ విల్లే అంతగా రాణించింది లేదు. రాయల్స్ బ్యాటర్లను కట్టడి చేయాలంటే.. బెంగళూరు డెత్ ఓవర్ల స్పెషలిస్ట్ హర్షల్ పటేల్ గాడినపడాల్సి ఉంది. బ్యాటింగ్లో డుప్లెసిస్ ఆకట్టుకుంటున్నా మరో ఓపెనర్ అనుజ్ రావత్ వరుసగా రెండు మ్యాచ్ల్లో విఫలమయ్యాడు. కోహ్లీ, దినేశ్ కార్తిక్ మంచి ఆరంభాల్ని భారీ స్కోర్లుగా మలచడంలో విఫలమవుతున్నారు.
ఇవీ చూడండి: టీమ్ఇండియా యువ క్రికెటర్పై శాస్త్రి సంచలన వ్యాఖ్యలు
