టీ20 ప్రపంచకప్‌లో భాగంగా జింబాబ్వేతో జరిగిన మ్యాచ్లో విజయం సాధించిన టీమ్ఇండియా సూపర్-12 గ్రూప్-2లో అగ్రస్థానానికి చేరుకుంది. సెమీస్కు అర్హత సాధించింది. ఈ సెమీఫైనల్లో భాగంగా 10వ తేదీన ఇంగ్లాండ్తో తలపడేందుకు సిద్ధమవుతోంది. అయితే జింబాబ్వేతో జరిగిన మ్యాచ్లో మైదానంలో ఊహించని సంఘటన ఒకటి జరిగింది. భారత్‌కు చెందిన ఓ అభిమాని తన హీరో రోహిత్ శర్మను కలవాలని ఆశపడ్డాడు. అంతే.. భద్రతా సిబ్బంది కళ్లుగప్పి మైదానంలోకి దూసుకెళ్లాడు.
గమనించిన అధికారులు అతడి వెనక పరుగులు తీసి పట్టుకున్నారు. ఈ క్రమంలో రోహిత్‌ను చూస్తూనే అభిమాని ఉద్వేగానికి గురై కన్నీళ్లు పెట్టుకున్నాడు. అయితే, అతడు రోహిత్‌ను కలవకముందే సిబ్బంది పట్టుకుని బయటకు తీసుకెళ్లారు. ఇందుకు సంబంధించిన వీడియో సామాజిక మాధ్యమాల్లో వైరల్ అవుతోంది.
అయితే ఈ సాహసం చేసినందుకు ఆ కుర్రాడు భారీ మూల్యాన్నే చెల్లించుకోవాల్సి వచ్చింది. గ్రౌండ్ యాజమాన్యం ఆ కుర్రాడికి భారీ జరిమానా విధించినట్లు తెలిసింది. ఈ విషయాన్ని చాలా సీరియస్ గా తీసుకున్న మెల్బోర్న్ క్రికెట్ గ్రౌండ్ యాజమాన్యం.. ఆ కుర్ర అభిమానికి అక్షరాలా రూ. 6.5 లక్షల జరిమానా విధించినట్లు తెలిసింది. అభిమానులు తమ ఆరాధ్యదైవంగా భావించే క్రికెటర్లను కలుసుకోవడానికి ఇలాంటి సాహసాలు చేయడం కొత్తేం కాదు. కానీ జరిమానా విధించడం మాత్రం కొత్తే!
ఇదీ చూడండి: ఆ సమయంలో ధోనీ పంపిన మెసేజ్ మనసును తాకింది: కోహ్లీ
