తన కీర్తిని దెబ్బతీసేలా అసత్య ప్రచారం చేస్తున్నారని ఆరోపించాడు భారత మహిళా క్రికెట్ జట్టు మాజీ కోచ్ డబ్ల్యూవీ రామన్. ఈ విషయాన్ని నేషనల్ క్రికెట్ అకాడమీ హెడ్ ద్రవిడ్, బీసీసీఐ అధ్యక్షుడు గంగూలీ దృష్టికి తీసుకెళ్లాడు. వీటిని అరికట్టే విధంగా చర్యలు తీసుకోవాలని కోరాడు.
ఇటీవల మహిళా క్రికెట్ జట్టు కోచ్ పదవికి ఇంటర్వ్యూలు జరిగాయి. ఇందులో అప్పటివరకు కోచ్గా వ్యవహరించిన రామన్ను పక్కనపెట్టి గతంలో ఆ బాధ్యతలు నిర్వర్తించిన రమేశ్ పొవార్ను ఎంపిక చేసింది క్రికెట్ అడ్వైసరీ కమిటీ. అయితే తనను ఎంపిక చేయకపోవడంపై పరోక్షంగా అసంతృప్తి వ్యక్తం చేశాడు రామన్. తాను కోచ్గా పనికిరానని భావిస్తే తప్ప మరే ఇతర కారణాల(అసత్య ప్రచారం) వల్ల పక్కనపెట్టినా.. అది తనను తీవ్రంగా కలచివేస్తుందని చెప్పాడు. అవసరమైతే తనపై వచ్చిన ఆరోపణలకు వివరణ ఇవ్వడానికి కూడా సిద్ధంగా ఉన్నట్లు తెలిపాడు.
ఈ ఇంటర్వ్యూ ప్రక్రియలో మదన్లాల్ నేతృత్వంలోని కమిటీ పారదర్శకంగా వ్యవహరించలేదని, సరైన కారణం లేకుండానే రామన్ను పక్కన పెట్టారన్న ఆరోపణలొస్తున్నాయి.
పేరు చెప్పకుండానే.. జట్టులో ప్రస్తుతమున్న స్టార్ సంస్కృతి మారాలని లేఖలో పేర్కొన్నాడు రామన్. ఈ కల్చర్ జట్టుకు చేటు చేస్తుందని ఆరోపించాడు. దానికి స్వస్తి పలికేలా చర్యలు చేపట్టాలని విజ్ఞప్తి చేశాడు.
ఇదీ చూడండి: కొత్త కోచ్ ఎంపికపై మహిళల క్రికెట్లో రగడ
