వివాదాస్పద ట్వీట్లపై క్రమశిక్షణ ఉల్లంఘన చర్యల కింద చేపట్టిన విచారణలో భాగంగా ఎనిమిదేళ్ల క్రితం స్త్రీ వివక్ష, జాత్యంహకార సందేశాలను సామాజిక మాధ్యమాల్లో పోస్ట్లు చేశాడని ఇంగ్లాండ్ యువ బౌలర్ ఒల్లీ రాబిన్సన్ (Ollie Robinson)ను సోమవారం అంతర్జాతీయ క్రికెట్ నుంచి సస్పెండ్ చేసింది ఈసీబీ. ఇందులో భాగంగానే ఇప్పుడు ఆ దేశానికి చెందిన మరో ఆటగాడిని విచారించినట్లు అక్కడి ఓ ప్రముఖ వార్త సంస్థ తెలిపింది. అయితే ఆ ఆటగాడు ఎవరనేది ఈసీబీ తెలపలేదని వెల్లడించింది. ఆ క్రికెటర్ జాతివివక్ష వ్యాఖ్యలు చేసిన సమయంలో అండర్ 16 కేటగిరిలో ఉన్నాడని పేర్కొంది.
"ఒల్లీ రాబిన్సన్పై చర్య అనంతరం మరో ఆటగాడు కూడా అలాంటి ట్వీట్స్ చేశాడని మాకు సమాచారం అందింది. ప్రస్తుతం అతడిని విచారిస్తున్నాం. త్వరలోనే అన్ని విషయాలు వెల్లడిస్తాం" అని ఓ ఈసీబీ అధికారి తెలిపినట్లు సదరు వార్తా సంస్థ వెల్లడించింది.
రాబిన్సన్ 2012-13.. 19ఏళ్ల వయసులో స్త్రీ వివక్ష, జాత్యంహకార వ్యాఖ్యలు చేసినట్లు విచారణలో తేలడం వల్ల ఈసీబీ అతడిని అంతర్జాతీయ క్రికెట్ ఆడకుండా సస్పెన్షన్ విధించింది. కాగా, లార్డ్స్ వేదికగా న్యూజిలాండ్తో జరిగిన మొదటి టెస్టులో రెండు ఇన్నింగ్స్ల్లో 7 వికెట్లతో సత్తాచాటాడు రాబిన్సన్. మొదటి ఇన్నింగ్స్లో 42 పరుగులు కూడా చేశాడు. ఇదే ఇతడికి టెస్టుల్లో మొదటి మ్యాచ్ కావడం గమనార్హం.
ఇదీ చూడండి: అంతర్జాతీయ క్రికెట్ నుంచి రాబిన్సన్ సస్పెండ్
