Dhoni Tennis: భారత క్రికెట్ మాజీ కెప్టెన్ ధోనీ పేరు వినని వారుండరు. క్రికెట్లో తనకంటూ ఓ చరిత్ర లిఖించుకున్న అతడు.. ఇప్పుడు టెన్నిస్ కోర్టులోనూ తన సత్తా చాటుతున్నాడు. రాంచీలోని జేఎస్సీఏ(ఝార్ఖండ్ స్టేట్ క్రికెట్ అసోసియేషన్) నిర్వహిస్తున్న టెన్నిస్ టోర్నమెంట్‌లో అతడు అద్భుతంగా ఆడుతున్నాడు. గత మూడు రోజులుగా జరుగుతున్న ఈ టోర్నీ డబుల్స్ కేటగిరీలో ధోనీ ద్వయం ఫైనల్కు చేరుకుంది.
టోర్నీ సెమీఫైనల్ మ్యాచ్‌లో ధోనీ-సుమిత్ బజాజ్ జోడీ.. 6-0, 6-0తో రాజేష్, శశి జోడీపై విజయం సాధించింది. దీంతో ఫైనల్లో అడుగుపెట్టింది. ఫైనల్లో ధోనీ ద్వయం వినీత్-కైఫ్ ద్వయంతో తలపడనుంది. అంతకుముందు జరిగిన క్వార్టర్ ఫైనల్ మ్యాచ్‌లో కూడా ధోనీ-సుమిత్ ద్వయం 9-0, 9-0 తేడాతో ప్రత్యర్థిని ఓడించింది. టెన్నిస్ ఆడుతున్న ధోనీని చూసేందుకు ప్రేక్షకులు స్టేడియానికి తరలివస్తున్నారు. కాగా, మిస్టర్ కూల్ సమయం దొరికినప్పుడల్లా ఫుట్‌బాల్, టెన్నిస్‌తో సహా అనేక ఇతర క్రీడలను ఉత్సాహంగా ఆడుతుంటాడు.
