ఆరు టీమ్లతో మహిళల ఐపీఎల్ నిర్వహించాలని టీమ్ఇండియా మహిళా క్రికెటర్ స్మృతి మంధాన అభిప్రాయపడింది. ఇలా చేస్తే భారత జట్టు బెంచ్ స్ట్రెంత్ను మరింత దృఢంగా చేయొచ్చని తెలిపింది.
టీ20 లీగ్స్ను ప్రారంభించాక పురుష జట్టులో క్రికెటర్ల ఆటతీరు మెరుగైందని తెలిపిన మంధాన.. మహిళల జట్టులోను అదే జరుగుతుందని పేర్కొంది. రవిచంద్రన్ అశ్విన్ యూట్యూబ్ ఛానల్లో మాట్లాడిన ఆమె 10 ఏళ్ల క్రితం ఐపీఎల్ భిన్నంగా ఉండేదని తెలిపింది. మహిళా క్రికెటర్లు తమ ఆటతీరును మెరుగుపరుచుకునేందుకు ఈ లీగ్ వేదికగా మారాలని ఆశించింది.
బిగ్ బాష్ లీగ్ వల్ల ఆస్ట్రేలియా మహిళా జట్టు ఆటతీరు మారిందని చెప్పుకొచ్చింది మంధాన. ఈ లీగ్ నిర్వహణతో 40-50 మంది ప్లేయర్లను అంతర్జాతీయ క్రికెట్లో ఆడించేందుకు ఆసీస్ సిద్ధం చేసిందని చెప్పింది. ఈ తరహాలోనే బీసీసీఐ.. మహిళా ఐపీఎల్ నిర్వహించాలని కోరింది.
ప్రస్తుతం బీసీసీఐ మహిళల కోసం మూడు జట్లతో టీ20ని నిర్వహిస్తోంది. ట్రయల్బ్లేజర్స్, సూపర్నొవాస్, వెలాసిటీ జట్లు ఈ పోటీలో పాల్గొంటాయి. కానీ మూడుకు బదులు ఆరు జట్లతో లీగ్ నిర్వహిస్తే మహిళా జట్లు కూడా మరింత బలంగా తయారవుతాయని కొందరు అభిప్రాయపడుతున్నారు.
ఇదీ చదవండి:
స్మృతి - ఇషాన్.. ఈ డాషింగ్ లెఫ్ట్ హ్యాండర్ల స్టైలే వేరు!
