ప్రతి ఒక్కరికీ అసలు పేరుతో పాటు దాదాపుగా ముద్దుపేరు కూడా ఉంటుంది. కొందరికి పుట్టుకతో తల్లిదండ్రులు పెడితే మరికొందరికి వారి చేష్టల వల్ల వారి ప్రవర్తన వల్ల నిక్నేమ్లు పుట్టుకొస్తుంటాయి. అలాగే మన టీమ్ఇండియా కెప్టెన్ విరాట్ కోహ్లీకి కూడా ఓ నిక్నేమ్ ఉంది. అయితే ఆ పేరు అతడికి ఎవరు పెట్టారు. దాని వెనక ఉన్న విషయాలను కోహ్లీ గతంలో ఓసారి వెల్లడించాడు.
కోహ్లీ ముద్దు పేరు 'చీకూ'. కానీ, ఈ పేరు పాపులర్ కావడానికి మాత్రం మాజీ కెప్టెన్ ధోనీనే కారణం. ఆటలో భాగంగా కోహ్లీని పిలవడానికి చీకూ అనే పేరునే తరచూ మహీ ఉపయోగించేవాడు. వికెట్ల వెనక నుంచి పదే పదే పిలవడం ద్వారా అది కాస్త స్టంప్స్ మైక్లో రికార్డయింది. దీంతో ఈ నోటా ఆ నోటా ఆ నిక్నేమ్ అందరికీ తెలిసిపోయింది. విరాట్కు ఆ పేరును పెట్టింది మాత్రం తన చిన్ననాటి కోచ్. అతనే మొదటిసారిగా ఆ నిక్నేమ్తో పిలిచాడట.
"రంజీ ట్రోఫీ ఆడుతున్న సమయంలో నాకు బుగ్గలు బాగా ఉండేవి. అప్పట్లో కొత్త హెయిర్ స్టైల్ కోసం ప్రయత్నించడం వల్ల చెవులు, చెంపలు మాత్రమే కనిపించేవి. దీంతో కార్టూన్ పాత్ర చీకూ పేరును కోచ్ నాకు పెట్టేశారు. అప్పటి నుంచి అంతా అలా పిలవడం మొదలుపెట్టారు"
-కోహ్లీ, టీమ్ఇండియా కెప్టెన్.
ఇదీ చదవండి: ద్రవిడ్ ఎన్సీఏలో కోచ్లకు 'కొత్త పాఠాలు'
