రాబోయే టీ20 ప్రపంచకప్‌లో టీమ్ఇండియా ఎలా ఆడనుందనే విషయంపై ఆసక్తి పెరిగింది. కెప్టెన్ రోహిత్ శర్మ, మాజీ కెప్టెన్ విరాట్ కోహ్లీ లాంటి స్టార్‌ ఆటగాళ్లు ఇటీవల ముగిసిన భారత టీ20 లీగ్‌లో విఫలమైన సంగతి తెలిసిందే. ఈ నేపథ్యంలో భారత్‌ ఎలాంటి ప్రదర్శన చేస్తుందనేది ఆసక్తిగా మారింది. అయితే, ఇదే విషయంపై దిగ్గజ సారథి కపిల్ దేవ్ తాజాగా ఓ యూట్యూబ్‌ ఛానల్‌తో మాట్లాడారు. ఈ సందర్భంగా ఆయన టీమ్ఇండియా బ్యాటింగ్‌ తీరుపై స్పందించారు. రోహిత్, కోహ్లీ, కేఎల్ రాహుల్ లాంటి ఆటగాళ్లు ఒత్తిడికి గురికాకుండా ఆడాలన్నారు.
" ఈ ముగ్గురూ పెద్ద ఆటగాళ్లే. వారిపై భారీ అంచనాలు ఉండటం వల్ల కూడా తీవ్ర ఒత్తిడికి గురవుతున్నట్టు ఉన్నారు. అయితే, అది వారికి సమస్య కాకూడదు. వీరు భయం లేకుండా, ధాటిగా ఆడాలి. కోహ్లీ, రోహిత్, రాహుల్.. 150-160 స్ట్రైక్‌రేట్‌తో ఆడగల సత్తా ఉన్న ఆటగాళ్లే. అంత గొప్ప బ్యాట్స్‌మెన్‌ అయినా కీలక సమయాల్లో చేతులెత్తేస్తున్నారు. పరుగులు చేయాల్సినప్పుడు ఔటవుతున్నారు. వాళ్లు క్రీజులో నిలవాలంటే మొదట కొన్ని బంతులు ఆడితే మంచిది. కానీ, నాలుగైదు ఓవర్లు ఆడాక ఔటైతే ఎలా?"
- కపిల్ దేవ్
గేర్‌ మార్చి ధనాధన్‌ బ్యాటింగ్‌ చేయాల్సినప్పుడు ఔటైతేనే ఒత్తిడికి గురవుతారని.. వాళ్లు హీరోలుగా మిగలాలనుకుంటున్నారా లేక జీరోలుగా మారాలనుకుంటున్నారా అనేది ఆయా ఆటగాళ్లు, జట్టే నిర్ణయించుకోవాలని సూచించారు కపిల్ దేవ్. వాళ్లు తమ ఆటతీరు మార్చుకోవాలని.. అది సాధ్యంకాకపోతే వారిని తప్పించాల్సిన అవసరం ఉందన్నారు. వాళ్లు నిజంగా పెద్ద ఆటగాళ్లే అయితే, అలాంటి ప్రదర్శనలే చేయాలి. పేరుకే గొప్ప ఆటగాళ్లైతే సరిపోదు. ప్రదర్శన కూడా అలాగే ఉండాలిని చురకలంటించారు.
ఇదీ చూడండి: వకార్‌ కాదు.. వారే నాకు స్ఫూర్తి: ఉమ్రాన్ మాలిక్‌
