How to Make Bread Halwa Bobbatlu: చాలా మంది ఇష్టంగా తినే స్వీట్ రెసిపీలలో బొబ్బట్లు ఒకటి. వీటినే ప్రాంతాన్ని బట్టి భక్ష్యాలు, ఒబ్బట్టు, పూరన్పోలీ అంటూ రకరకాల పేర్లతో పిలుస్తుంటారు. ముఖ్యంగా చాలా మంది పండగలు, పూజలు, ప్రత్యేక వేడుకల సమయంలో ఈ బొబ్బట్లను ప్రిపేర్ చేసుకుంటుంటారు. అయితే బొబ్బట్లు అనగానే చాలా మందికి శనగపప్పుతో చేసినవి మాత్రమే తెలుసు. కానీ, శనగపప్పుతో మాత్రమే కాకుండా బ్రెడ్తో కూడా భక్ష్యాలు ప్రిపేర్ చేసుకోవచ్చు. ఇవి మామూలు బొబ్బట్ల కంటే చాలా రుచికరంగా ఉంటాయి. మరి, లేట్ చేయకుండా ఈ స్వీట్ చేయడానికి కావాల్సిన పదార్థాలు, ప్రిపరేషన్ విధానం వివరాలు ఈ స్టోరీలో చూద్దాం.
కావాల్సిన పదార్థాలు:
- గోధుమ పిండి - 1 కప్పు
- బొంబాయి రవ్వ - 2 టేబుల్ స్పూన్లు
- ఉప్పు - పావు టీ స్పూన్
- పసుపు - చిటికెడు
- నూనె - 3 టీ స్పూన్
- బ్రెడ్ స్లైస్లు - 5
- నెయ్యి - సరిపడా
- బెల్లం - అర కప్పు
- నీళ్లు - అర కప్పు
- యాలకుల పొడి - 1 టీ స్పూన్
తయారీ విధానం:
- ఓ బౌల్లోకి గోధుమ పిండి, బొంబాయి రవ్వ, ఉప్పు, పసుపు, 1 టీ స్పూన్ నూనె వేసి బాగా కలుపుకోవాలి.
- ఇప్పుడు కొద్దికొద్దిగా నీళ్లు పోసుకుంటూ పిండిని సాఫ్ట్గా కలుపుకుని చపాతీ ముద్దలాగా చేసుకోవాలి. ఆ పిండి ముద్దపై 2 టీ స్పూన్ల నూనె పోసి మూత పెట్టి పక్కన పెట్టాలి.
- మిక్సీజార్లోకి బ్రెడ్ స్లైస్లను చిన్నగా కట్ చేసుకుని వేసుకుని మెత్తగా గ్రైండ్ చేసుకోవాలి.
- స్టవ్ ఆన్ చేసి పాన్ పెట్టి 3 టేబుల్ స్పూన్ల నెయ్యి వేసి కరిగించుకోవాలి. ఆపై కరిగిన నెయ్యిలో గ్రైండ్ చేసిన బ్రెడ్ పౌడర్ వేసి గోల్డెన్ బ్రౌన్ కలర్లోకి వచ్చేవరకు వేయించుకోవాలి.
- ఈ లోపు మరోస్టవ్ మీద గిన్నె పెట్టి అందులోకి బెల్లం తురుము, వాటర్ పోసుకోవాలి. బెల్లం కరిగిన వెంటనే స్టవ్ ఆఫ్ చేయాలి.
- కరిగించిన బెల్లం నీటిని జల్లెడ సాయంతో వడకట్టి బాగా ఫ్రై అయిన బ్రెడ్ పౌడర్లో వేసి కలపి ఉడికించుకోవాలి.
- బ్రెడ్ మిశ్రమం దగ్గరపడుతున్నప్పుడు యాలకుల పొడి, కొద్దిగా నెయ్యి వేసి మరోసారి కలిపి నెయ్యి పైకి తేలి మిశ్రమం పాన్కు అంటుకోకుండా సెపరేట్ అయ్యేంతవరకు కలుపుతూ కుక్ చేసుకోవాలి.
- మిశ్రమం దగ్గరపడిన తర్వాత స్టవ్ ఆఫ్ చేసి చల్లారనివ్వాలి. ఆపై గోరువెచ్చగా ఉన్నప్పుడు చిన్న చిన్న బాల్స్గా చేసుకుని పక్కన పెట్టాలి.
- ముందే కలిపిన గోధుమ పిండి ముద్దను మళ్లీ కలిపి మీడియం సైజ్ ఉండలుగా చేసుకోవాలి.
- చపాతీ పీట మీద బటర్ పేపర్ వేసి కొద్దిగా నెయ్యి అప్లై చేయాలి. దాని మీద చపాతీ ఉండను ఉంచి చేతితోనే కొద్దిగా స్ప్రెడ్ చేయాలి.
- ఇప్పుడు అందులోకి బ్రెడ్ హల్వా బాల్ను ఉంచి పూర్తిగా క్లోజ్ చేయాలి. ఆపై చేతికి నెయ్యి రాసుకుంటూ వీలైనంత పల్చగా వత్తుకోవాలి.
- స్టౌపై పెనం పెట్టుకొని వేడి చేసుకోవాలి. పాన్ హీట్ అయిన తర్వాత ఒత్తుకున్న బొబ్బట్టును వేసి నేతితో రెండు వైపులా ఎర్రగా కాల్చుకోవాలి.
- ఇలా అన్నింటిని చేసుకుని ఓ డబ్బాలో స్టోర్ చేసుకుంటే చాలు ఎంతో టేస్టీగా ఉండే బ్రెడ్ హల్వా బొబ్బట్లు రెడీ.
- ఇక వీటిని నెయ్యి, ముద్దపప్పుతో కలిపి తింటుంటే ఆ టేస్ట్ మరో లెవల్ ఉంటుంది. నచ్చితే వెంటనే ట్రై చేయండి.
ఈ ఉగాదికి స్పెషల్ బొబ్బట్లు - పైనాపిల్‌తో అదరగొట్టేయండి!
సేమియాతో పాయసం, ఉప్మానే కాదు - ఇలా "బొబ్బట్లు" చేసుకోండి! - రుచి అమృతమే!
