Bumrah Asia Cup: ప్రతిష్టాత్మక ఆసియా కప్కు ముందు టీమ్ఇండియాకు పెద్ద షాక్ తగిలింది. సీనియర్ ఫాస్ట్ బౌలర్ జస్ప్రీత్ బుమ్రా.. ఈ టోర్నీకి దూరమయ్యాడు. బుమ్రా వెన్నునొప్పితో బాధపడుతున్నట్లు బీసీసీఐ సీనియర్ అధికారి ఒకరు వెల్లడించారు. ఆసియా కప్ కోసం భారత జట్టును సోమవారమే ఎంపిక చేయనుంది సెలక్షన్ కమిటీ. అయితే.. జట్టును ఇవాళే ప్రకటిస్తారా లేదా అనేది స్పష్టత లేదు. గాయం తీవ్రతరం కాకుండా.. బుమ్రా టీ-20 వరల్డ్కప్ వరకు సిద్ధంగా ఉండేందుకే విశ్రాంతిని ఇస్తున్నట్లు ఆ అధికారి తెలిపారు.
''జస్ప్రీత్ బుమ్రా వెన్నుగాయంతో బాధపడుతున్నాడు. అతడు ఆసియా కప్లో ఆడటం లేదు. బుమ్రా.. మా ప్రధాన బౌలర్. టీ-20 వరల్డ్ కప్లో అతడు కచ్చితంగా జట్టులో ఉండాలి. అందుకే ఆసియా కప్లో ఆడించి మేం రిస్క్ చేయదల్చుకోలేదు. ఒకవేళ ఆడిస్తే.. గాయం తీవ్రతరం కావొచ్చు.''
- బీసీసీఐ సీనియర్ అధికారి
వెస్టిండీస్, జింబాబ్వే సిరీస్ల కోసం ఇప్పటికే బుమ్రాకు విశ్రాంతినిచ్చింది సెలక్షన్ కమిటీ. చివరగా ఈ స్టార్ పేసర్.. ఇంగ్లాండ్ వన్డే సిరీస్లో ఆడాడు. సెప్టెంబర్-అక్టోబర్లో ఆస్ట్రేలియా, దక్షిణాఫ్రికా భారత్లో పర్యటించనున్నాయి. అప్పటివరకు బుమ్రా జట్టులోకి చేరే అవకాశముంది. అంతకంటే ముందు బుమ్రా.. బెంగళూరులోని జాతీయ క్రికెట్ అకాడమీలో ఫిట్నెస్ నిరూపించుకోవాల్సి ఉంటుంది. ప్రస్తుతం బుమ్రా.. తన కుటుంబంతో కలిసి అమెరికాలో హాలిడే ట్రిప్ను ఎంజాయ్ చేస్తున్నాడు.
ఆసియా కప్ ఆగస్టు 27న ప్రారంభం కానుంది. 28న భారత్ తన తొలి మ్యాచ్ను పాకిస్థాన్తో ఆడనుంది. సెప్టెంబర్ 11న ఫైనల్.
ఇవీ చూడండి: హాకీలో భారత్ పసిడి ఆశలు ఆవిరి.. ఆసీస్ చేతిలో చిత్తు.. సిల్వర్తో సరి
