ఇటీవల లఖ్నవూ సూపర్ జెయింట్స్‌తో జరిగిన మ్యాచ్‌లో సన్రైజర్స్ హైదరాబాద్ ఓటమిపాలయ్యింది. దీంతో ఆడిన రెండో మ్యాచ్లోనూ పరాజయాన్ని చవి చూసింది. వరసు ఓటములను ఎదుర్కొంటున్న సన్రైజర్స్ జట్టు ఈ సీజన్లో ఎలగైనా గెలవాలని ఆత్రుతగా ఎదురుచూస్తోంది. అయితే ఈ ఓటమి వల్ల అభిమానులు అసంతృప్తితో ఉన్నారు. అది కూడా మార్క్‌క్రమ్ టీమ్లోకి వచ్చి కూడా మ్యాచ్ ఓడిపోవడం వల్ల మరింత నిరాశ చెందుతున్నారు. ఈ క్రమంలో సన్ రైజర్స్‌పై టీమ్ఇండియా మాజీ క్రికెటర్ హర్భజన్ సింగ్ సంచలన వ్యాఖ్యలు చేశాడు. ఆరెంజ్ ఆర్మీ ఈ సీజన్లో పవర్ ప్యాక్ పర్ఫార్మెన్స్ ఇస్తుందని తాను అసలు అనుకోవట్లేదని అన్నాడు.
"సన్రైజర్స్ జట్టు సభ్యులు ఈ సీజన్లో 170 నుంచి 190 పరుగులు చేస్తారని నేను అనుకోవడం లేదు. మార్క్‌క్రమ్ ఆడకపోతే వారికి ఇంకా కష్టంగా ఉంటుంది. అయితే రాహుల్ త్రిపాఠి నైపుణ్యం కలిగిన బ్యాటర్ అనే విషయంలో ఎటువంటి సందేహం లేదు. కానీ ఈ సీజన్లో మాత్రం అతను అనుకున్న స్థాయిలో రాణించలేడని అనిపిస్తోంది. తదుపరి మ్యాచ్‌ల్లో ఏమైనా ఆడతాడో లేదో వేచి చూడాలి." అని హర్భజన్ విశ్లేషించాడు.
మరోవైపు కేఎల్ రాహుల్ కెప్టెన్సీపై ప్రశంసల వర్షం కురిపించాడు హర్భజన్. "రాహుల్ కెప్టెన్సీ చాలా బాగుంది. అందుకే ఛేజింగ్‌లో పెద్ద షాట్లు ఆడాల్సిన అవసరం వారికి లేకపోయింది. అతడు 35 పరుగులతో రాణించగా.. కృనాల్ పాండ్య 34 పరుగులతోనే ఆకట్టుకున్నాడు. దీంతో లఖ్నవూ టీమ్ ఈజీగా గెలుపును సొంతం చేసుకుంది. అయితే ఈ మ్యాచ్ చాలా బోరింగ్‌గా, ఎటువంటి మజా లేకుండానే సాగింది. వీరికి పెద్దగా పరుగులేమీ లభించలేదు. వికెట్ కూడా చాలా నిదానంగా ఉంది. దీంతో బ్యాటింగ్‌ సమయంలోనే సన్రైజర్స్ సరెండర్ అయిపోయింది." అని హర్భజన్ అన్నాడు.
హైదరాబాద్‌తో శుక్రవారం జరిగిన మ్యాచ్‌లో లఖ్నవూ 5 వికెట్ల తేడాతో ఘన విజయం సాధించింది. 122 పరుగుల లక్ష్యాన్ని మరో నాలుగు ఓవర్లు ఉండగానే కేవలం 5 వికెట్లు కోల్పోయి ఛేదించింది. ఇక లఖ్నవూ బ్యాటర్లు అయిన కెప్టెన్ కేఎల్ రాహుల్(35), కృనాల్ పాండ్య(34) మైదానంలో ఆకట్టుకునే ప్రదర్శన ఇచ్చారు. అయితే దానికంటే ముందు తమ బౌలింగ్ దాడితో హైదరాబాద్‌ను తక్కువ స్కోర్ చేసేలా చేయడంలో సక్సెస్ అయ్యారు. ఇక హైదరాబాద్ బౌలర్లలో అదిల్ రషీద్ 2 వికెట్లు తీయగా.. భువనేశ్వర్ కుమార్, ఫజాల్ హఖ్ ఫరూఖి, ఉమ్రాన్ మాలిక్ చెరో వికెట్ తమ ఖాతాలో వేసుకున్నారు.
సన్ రైజర్స్ జట్టు : ఐదెన్ మార్‌క్రామ్‌(కెప్టెన్) అభిషేక్‌ శర్మ, మయాంక్‌ అగర్వాల్‌, రాహుల్ త్రిపాఠి, , హ్యారీ బ్రూక్‌, గ్లెన్‌ ఫిలిప్స్‌, ఆదిల్‌ రషీద్, వాషింగ్టన్‌ సుందర్‌, భువనేశ్వర్ కుమార్, ఉమ్రాన్ మాలిక్, టీ నటరాజన్‌, అమోల్ ప్రీత్సింగ్.
లఖ్నవూ జట్టు : కేఎల్ రాహుల్(కెప్టెన్), కృనాల్ పాండ్య, డికాక్‌, దీపక్‌ హుడా, కైల్‌ మేయర్స్‌, మార్కస్ స్టోయినిస్‌, నికోలస్ పూరన్‌, ఆయుష్ బదోని, రవి బిష్ణోయ్‌, మార్క్‌ ఉడ్‌, జయదేవ్ ఉనద్కత్‌, ఆవేశ్‌ ఖాన్‌.
