ఐపీఎల్ 16 సీజన్లో హోరాహోరీ మ్యాచ్ల పరంపర కొనసాగుతోంది. చెన్నై సూపర్ కింగ్స్తో జరిగిన ఉత్కంఠ పోరులో పంజాబ్ కింగ్స్ చివరి బంతికి విజయం సాధించింది. చెన్నై నిర్దేశించిన 201 పరుగుల లక్ష్యాన్ని పంజాబ్ కింగ్స్ ఆరు వికెట్లు కోల్పోయి ఛేదించింది. ఇంపాక్ట్ ప్లేయర్గా వచ్చిన ప్రబ్సిమ్రన్ (24 బంతుల్లో 42 )దూకుడుగా ఆడాడు. ధావన్ 28 పరుగులతో ఫర్వాలేదనిపించాడు. వన్డౌన్లో వచ్చిన అథర్వా నిరాశ పర్చినా.. లివింగ్ స్టోన్ చెన్నై బౌలర్లపై ఎదురు దాడికి దిగాడు. నాలుగు సిక్సర్లతో 24 బంతుల్లోనే 40 పరుగులతో రాణించాడు . దూకుడుగా ఆడుతున్న లివింగ్ స్టోన్ను దేశ్పాండే వెనక్కిపంపాడు. సామ్ కరన్ 29 పరుగులు చేసి వెనుదిరిగాడు. చివర్లో జితేశ్ శర్మ, సికిందర్ రజా పోరాటంతో చెన్నైకు ఓటమి తప్పలేదు. చెన్నై బౌలర్లలో దేశ్పాండే 3, జడేజా 2 వికెట్లు తీశారు. పతిరణ ఒక వికెట్ దక్కించుకున్నాడు. ఈ మ్యాచ్కే హైలెట్గా నిలిచిన 'కాన్వే'కు మ్యాన్ ఆఫ్ ద మ్యాచ్ అవార్డు లభించింది. ఈ విజయంతో పంజాబ్ ఐదో విజయాన్ని తన ఖాతాలో వేసుకుంది.
అంతకుముందు టాస్ గెలిచి బ్యాటింగ్కు దిగిన చెన్నైకి మెరుపు ఆరంభం లభించింది. నిర్ణీత 20 ఓవర్లలో నాలుగు వికెట్ల నష్టానికి 200 పరుగులు చేసింది. ఓపెనర్ డేవాన్ కాన్వే అజేయంగా (52 బంతుల్లో 92: 16x4, 1x6) పరుగులు సాధించాడు. మరో ఓపెనర్ రుతురాజ్ 37 పరుగులతో రాణించాడు. శివమ్ ధూబే (28) పరుగులు చేశాడు. ఆఖరి ఓవర్ చివరి రెండు బంతులకు ఫినిషర్ ధోని రెండు మెరుపు సిక్సర్లు బాదడం వల్ల సీఎస్కే రెండొందల మార్క్ అందుకుంది. ఇక పంజాబ్ బౌలర్లలో అర్షదీప్, సామ్ కర్రన్, రాహుల్ చాహర్, సికిందర్ రజా తలో వికెట్ తీశారు.
దంచికొట్టిన డేవాన్: ఈ సీజన్లో దుమ్ములేపుతున్న డేవాన్.. ఈ మ్యాచ్లోనూ తన సుపర్ ఫామ్ను కొనసాగించాడు. పంజాబ్ బౌలర్లను సమర్థంగా ఎదుర్కొంటూ ఫోర్ల వర్షం కురిపించాడు. బౌండరీల ద్వారానే 70 పరుగులు చేశాడు. ఓ వైపు మరో ఓపెనర్ రుతురాజ్ నెమ్మదిగా ఆడుతూ అడపాదడపా ఫోర్లతో ఫర్వాలేదనిపించాడు. ఇన్నింగ్స్ సాఫీగా సాగుతున్న సమయంలో 9 ఓవర్లో సికిందర్ రజా వీరిద్దరి జోడీని విడగొట్టాడు. దీంతో 86 పరుగుల భాగస్వామ్యానికి తెర పడింది.
