ఇండియన్ ప్రీమియర్ లీగ్ 2023లో మొదటిసారి వర్షం కారణంగా మ్యాచ్ రద్దు అయ్యింది. చెన్నై సూపర్ కింగ్స్, లఖ్నవూ సూపర్ జెయింట్స్ మధ్య మ్యాచ్ జరగాల్సి ఉండగా.. ప్రారంభం నుంచే వరణుడు అడ్డుపడ్డాడు. దీంతో మ్యాచ్ అరగంట ఆలస్యంగా ప్రారంభం అయింది. ఫస్ట్ ఇన్నింగ్స్ 19.2 ఓవర్ల వద్ద వర్షం మరోసారి ఆటకు ఆటంకం కలిగించింది. ఎంతకీ వర్షం తగ్గనందున మ్యాచ్ను రద్దు చేస్తున్నట్లు అంపైర్లు ప్రకటించారు. ఇరు జట్లకు చెరో పాయింట్ ఇచ్చారు. దీంతో లఖ్నవూ రెండో స్థానంలో ఉండగా.. చెన్నై మూడో స్థానంలో కొనసాగుతోంది.
టాస్ గెలిచిన సీఎస్కే లఖ్నవూ సూపర్ జెయింట్స్ను బ్యాటింగ్కు ఆహ్వానించింది. బ్యాటింగ్కు దిగిన లఖ్నవూకు మంచి ఆరంభం దక్కలేదు. పిచ్పై తేమ ప్రభావం స్పష్టంగా కనిపించింది. ఇన్నింగ్స్ నాలుగో ఓవర్లోనే ఓపెనర్ మేయర్స్ను మొయిన్ అలీ ఔట్ చేశాడు. ఆ తర్వాత లఖ్నవూ క్రమం తప్పకుండా వికెట్లు కోల్పోయింది. మనన్ వోహ్రా(10), కరణ్ శర్మ(9), కృనాల్ పాండ్య (0), మార్కస్ స్టోయినిస్(6), గౌతమ్(1) లు వెంటవెంటనే వెనుదిరిగారు. సీఎస్కే బౌలర్లలో మొయిన్, పతిరణ, తీక్షణ తలో రెండు వికెట్లు తీశారు. ఇంత లో-స్కోరింగ్ ఇన్నింగ్స్లో కూడా సీఎస్కే బౌలర్ దీపక్ చాహర్ పదికి పైగా ఎకనమీతో 41 పరుగులు సమర్పించుకున్నాడు.
ఆదుకున్న బదోనీ...
10 ఓవర్లు ముగిసేసరికి లఖ్నవూ 44-5తో పీకల్లోతు కష్టాల్లో కూరుకుపోయింది. ఈ స్థితిలో క్రీజులోకి వచ్చిన బదోనీ పూరన్తో కలిసి ఇన్నింగ్స్ను చక్కదిద్దే ప్రయత్నం చేశాడు. సీఎస్కే బౌలర్లను ధాటిగా ఎదుర్కొంటూ బౌండరీలు బాదాడు. మరో ఎండ్లో పూరన్(20) బాధ్యతగా వికెట్ కోల్పోకుండా ఆడాడు. బదోనీ (59*) హాఫ్ సెంచరీతో మెరిశాడు. ఈ ఇన్నింగ్స్లో నాలుగు సిక్సర్లు నమోదయ్యాయి. ఈ నాలుగు సిక్స్లు బాదోనియే బాదాడు. వీరిద్దరూ ఆరో వికెట్కు 59 పరుగుల భాగస్వామ్యం నెలకొల్పారు. పద్దెనిమిదో ఓవర్లో పూరన్ను, ఆఖరి ఓవర్లో గౌతమ్ను.. మతీషా పతిరణ పెవీలియన్కు పంపాడు.
మ్యాచ్కు రాహుల్ దూరం...
సోమవారం రాయల్ ఛాలెంజర్స్ బెంగళూర్తో జరిగిన మ్యాచ్లో రాహుల్ తీవ్రంగా గాయపడ్డాడు. గాయం కారణంగా రాహుల్ తర్వాతి మ్యాచ్లు ఆడేది కూడా డౌటే. అయితే రాహుల్ గాయానికి చికిత్సకు సంబంధించిన అంశాన్ని బీసీసీఐ టేకప్ చేసినట్లు తెలుస్తోంది. వచ్చే నెలలో డబ్ల్యూటీసీ ఫైనల్ ఉన్నందున ఆ సమయంలోపు అతడు గాయం నుంచి కోలుకోవాలని రాహుల్ అభిమానులు ఆశిస్తున్నారు. గత మ్యాచ్లో కూడా ఆఖర్లో బ్యాటింగ్కు వచ్చిన రాహుల్... నొప్పితో బాధ పడుతూనే బ్యాటింగ్ చేశాడు. రాహుల్ ఇంకా కోలుకోని కారణంగా ఈరోజు కృనాల్ పాండ్య లఖ్నవూ కెప్టెన్గా బాధ్యతలు తీసుకున్నాడు. కాగా ఈ మ్యాచ్లో కృనాల్ గోల్డెన్ డక్గా పెవీలియన్ చేరాడు.
