ఐపీఎల్ తొలి మ్యాచ్లో చెన్నై సూపర్కింగ్స్పై ముంబయి ఇండియన్స్ పరాజయం చెందింది. తొలుత బ్యాటింగ్ చేసిన జట్టుకు మంచి ఆరంభం లభించింది. కానీ ఆ తర్వాత వెంటవెంటనే ఐదు వికెట్లు కోల్పోవడం వల్ల అదే ఊపును చివరి వరకు కొనసాగించలేక పోయింది.
తొలుత బ్యాటింగ్కు దిగిన ముంబయి ఇండియన్స్ రెండు వికెట్ల నష్టానికి 85 పరుగులతో మంచి రన్రేట్సాధించింది. 20 ఓవర్లు పూర్తయ్యే సరికి 9 వికెట్ల నష్టానికి 162 పరుగులు చేసింది. ఛేదనలో చెన్నై సూపర్కింగ్స్ 5 వికెట్లు కోల్పోయి లక్ష్యాన్ని ఛేదించింది. అంబటి రాయుడు (71), డుప్లెసిస్ (58) మంచి భాగస్వామ్యం చేసి జట్టుకు విజయాన్ని అందించారు. మ్యాచ్ ముగిసిన అనంతరం ముంబయి ఇండియన్స్ కెప్టెన్ రోహిత్ శర్మ మాట్లాడుతూ.. తర్వాతి మ్యాచ్లో తెలివిగా రాణిస్తామని తెలిపాడు.
"డుప్లెసిస్, రాయుడు లాగా మా బ్యాట్స్మెన్ ఎవరూ ఆడలేదు. మొదటి 10 ఓవర్లలో మేం 85 పరుగులు చేశాం. చివర్లో సీఎస్కే బౌలర్లు ఎంతో చక్కగా బౌలింగ్ చేశారు. టోర్నీ ఇప్పుడే ప్రారంభమైంది కాబట్టి ఈ మ్యాచ్లో మేం చేసిన తప్పులను సరిదిద్దుకుని తర్వాతి మ్యాచ్లో తెలివిగా రాణిస్తాం. పిచ్లకు అనుగుణంగా మా జట్టులో మార్పులు జరగాల్సిన అవసరం ఉంది."
- రోహిత్ శర్మ, ముంబయి ఇండియన్స్ కెప్టెన్
స్టాండ్స్లో అభిమానులు లేకుండా ఆడుతున్న అనుభూతి గురించి రోహిత్ మాట్లాడుతూ.."ప్రేక్షకుల కేరింతల మధ్య ఆడటానికి అలవాటు పడ్డాం. కానీ, ప్రస్తుతం స్టేడియంలో వీక్షకులు లేరని తెలుసు. ఏమైనప్పటికీ.. ఇది కొత్తగా ఉంది. అయితే త్వరలోనే ఈ పరిస్థితులు మారతాయని ఆశిస్తున్నా" అని అన్నాడు.
