ఇండియన్‌ టీ20 లీగు రోజురోజుకీ మరింత ఆసక్తికరంగా తయారవుతోంది. ప్లేఆఫ్స్‌ ఇక ఖాయమే అనుకున్న జట్లు అనూహ్యంగా ఓటమి పాలవుతున్నాయి. ఇక పనైపోయిందనుకున్న పట్టికలోని కింది జట్లు విజయ ఢంకా మోగిస్తున్నాయి. మ్యాచు మ్యాచుకూ పరిస్థితులు తారుమారు అవుతుండటంతో నాకౌట్‌కు చేరుకొనే నాలుగో జట్టేదో ఇప్పుడే ఎవ్వరూ చెప్పలేకపోతున్నారు. తాజాగా దిల్లీపై హైదరాబాద్ విజయదుందుభి మోగించడంతో సమీకరణాలు మరింత సంక్లిష్టంగా మారాయి.
ఎవరో ఒకరు ఖాయం
పట్టికలో తొలి రెండు స్థానాల్లో ఉన్న ముంబయి, బెంగళూరు బుధవారం తలపడుతున్నాయి. వీరిప్పుడు 14 పాయింట్లతో సమంగా ఉన్నారు. ఏదో ఓ జట్టు గెలవక తప్పదు. దాంతో 16 పాయింట్లతో ఆ జట్టు ప్లేఆఫ్స్‌ చేరుకొనే మొదటి బృందంగా నిలుస్తుంది. 11 మ్యాచులాడిన ఈ రెండు జట్లకు రెండో అర్ధభాగంలో పరాజయాలు ఎదురవ్వడంతో గెలుపు కోసం తహతహలాడుతున్నాయి. మరి నేటి పోరులో విజయం కోహ్లీసేనదా? రోహిత్‌ బృందానిదా? చూడాలి.
ఈ మ్యాచులో బెంగళూరు గెలిస్తే హైదరాబాద్, దిల్లీ చేతిలో ఓడినా ఫర్వాలేదు. అయితే రన్‌రేట్‌ మాత్రం మెరుగ్గానే ఉంచుకోవాలి. ముంబయి చేతిలో ఓడితే మాత్రం మిగతా రెండు మ్యాచుల్లో గెలిస్తేనే టాప్‌-2లో అవకాశం ఉంటుంది. ముంబయి పరిస్థితీ ఇంచుమించు అలాంటిదే. కోహ్లీసేన చేతిలో ఓడితే.. మళ్లీ హైదరాబాద్, దిల్లీ జట్లలో ఏదో ఒకదానిపై విజయం అందుకోవాల్సిందే. టేబుల్‌ టాపర్‌ అవ్వాలంటే మాత్రం రెండింట్లోనూ గెలవాలి. ఏదేమైనప్పటికీ ఈ రెండు జట్లు ప్లేఆఫ్స్‌ చేరుకోవడం ఖాయం!
దిల్లీ.. తికమక
ఎటొచ్చీ దిల్లీ పరిస్థితే ఇప్పుడు గందరగోళంగా మారింది. 14 పాయింట్లతో టేబుల్‌ టాపర్‌గా ఉన్న ఆ జట్టుకు ఇప్పుడు హ్యాట్రిక్‌ ఓటముల సెగ తగిలింది. కోల్‌కతా, హైదరాబాద్ చేతిలో ఘోర ఓటమితో రన్‌రేట్‌ బాగా పడిపోయింది. మూడో స్థానానికి చేరుకుంది. ఇక దానికి మిగిలింది రెండే మ్యాచులు. ఒకటి ముంబయి, రెండోది బెంగళూరు. ఈ రెండింట్లో గెలిస్తే 18 పాయింట్లతో టాప్‌-2లో ఉంటుంది. ఏదో ఒకటి గెలిస్తే మూడో స్థానంలోనైనా నిలుస్తుంది. రెండింట్లో ఓడిపోతే మాత్రం నెట్‌ రన్‌రేట్‌తో గట్టెక్కాల్సిన పరిస్థితి రావొచ్చు. ప్రస్తుతానికైతే ఢోకా లేదని చెప్పొచ్చు.
మస్తు.. మజా
ప్లేఆఫ్స్‌లో చోటుకోసం అత్యంత తీవ్రంగా పోటీపడుతున్న రెండు జట్లు పంజాబ్, కోల్‌కతా. విచిత్రంగా ఈ రెండు జట్లు తర్వాతి రెండు మ్యాచుల్లో రాజస్థాన్‌, చెన్నైతో తలపడాల్సి ఉంది. వరుస విజయాలతో జోరుమీదున్న రాహుల్ సేన రెండూ గెలిస్తే 16 పాయింట్లతో బిందాస్‌గా ప్లేఆఫ్స్‌ చేరుకుంటుంది. అయితే కోల్‌కతా కనీసం ఒక మ్యాచులోనైనా ఓడిపోవాలి. మోర్గాన్‌ సేనా మిగతా రెండింట్లో గెలిస్తే మాత్రం నెట్‌ రన్‌రేట్‌ చూడక తప్పదు. అయితే విచిత్రంగా ముంబయి, దిల్లీ, బెంగళూరులో ఏదో ఒక జట్టు అన్నింట్లో ఓడిపోతే పంజాబ్, కోల్‌కతా రెండూ ప్లేఆఫ్స్‌ చేరుకొనే అవకాశం ఉంది. ఇప్పటికైతే శ్రేయస్ సేనకే ఆ బెంగ మరింతగా పట్టుకుంది. పంజాబ్, కోల్‌కతా ఏదైన ఒక మ్యాచులో ఓడిపోతే ప్లేఆఫ్స్‌ నుంచి నిష్ర్కమించే అవకాశాన్నీ కొట్టిపారేయలేం.
వాళ్లు.. ఓడిపోవాలి
ఇక హైదరాబాద్, రాజస్థాన్‌ ప్లేఆఫ్స్‌ అవకాశాలు మిగతా జట్లపై ఆధారపడి ఉన్నాయి. చెరో పది పాయింట్లతో వరుసగా 6, 7 స్థానాల్లో ఉన్న ఈ రెండు జట్లూ ఇకపై తాము ఆడబోయే మ్యాచుల్లో గెలవడమే కాకుండా పంజాబ్, కోల్‌కతా ఓడిపోవాలని కోరుకోవాలి! దిల్లీపై భారీ విజయం సాధించిన హైదరాబాద్ ఇకపై తలపడాల్సింది ముంబయి, బెంగళూరుతో. ఈ రెండింటి వేదిక షార్జానే. చిన్న మైదానంలో భారీ హిట్టర్లున్న ముంబయి, బెంగళూరును నిలువరించడం కష్టం.
ఇక రాజస్థాన్‌కు పంజాబ్, కోల్‌కతాపై వరుస విజయాలూ కష్టమే. పరిస్థితులు అనుకూలిస్తే నెట్‌ రన్‌రేట్‌ ఆధారంగా ఈ రెండింట్లో ఏదో ఒక జట్టుకు మాత్రమే అవకాశం ఉంటుంది. ఏదేమైనప్పటికీ ఇప్పుడున్న పరిస్థితుల్లో పంజాబ్, కోల్‌కతాకే ప్లేఆఫ్‌ అవకాశాలు మెండు.
ఇదీ చదవండి:ఐపీఎల్: ఆ విషయంలో గంగూలీ ఆశ్చర్యపడలేదు
