కింగ్స్ ఎలెవన్ పంజాబ్తో జరిగిన మ్యాచ్లో రాయల్ ఛాలెంజర్స్ బెంగళూరు పరాజయం చెందింది. బ్యాటింగ్, బౌలింగ్, ఫీల్డింగ్ ఇలా అన్ని విభాగాల్లో విఫలమైన బెంగళూరు ఘోర ఓటమి మూటగట్టుకుంది. సారథి కోహ్లీ రెండు క్యాచ్లు జారవిడియడం వల్ల బతికిపోయిన కేఎల్ రాహుల్ సెంచరీతో కదం తొక్కాడు. అయితే ఈ ఓటమిపై స్పందించిన కోహ్లీ తర్వాత మ్యాచ్లో తప్పులను సరిదిద్దుకుంటామని తెలిపాడు.
"ప్రారంభంలో మా బౌలర్లు అద్భుతంగా బౌలింగ్ చేశారు. పంజాబ్ బ్యాట్స్మన్ను కట్టడి చేశారు. ఈ ఓటమికి బాధ్యత వహిస్తున్నా. ఈరోజు మాకు కలిసిరాలేదు. రాహుల్ క్యాచ్లను రెండుసార్లు జారవిడిచాం. అది మరో 35-40 పరుగులకు కారణమైంది. లేదంటే 180 పరుగుల లోపే కట్టడి చేసేవాళ్లం. ఛేజింగ్లో ఒత్తిడికి గురయ్యాం. ఫిలిప్.. బిగ్బాష్ లీగ్లో టాపార్డర్లో వచ్చి మంచి ప్రదర్శన చేశాడు. అందుకే అతడిని మూడో స్థానంలో పంపించాం. మిడిల్ ఓవర్లలో ఇంకా మెరుగ్గా ఆడాలి."
-కోహ్లీ, ఆర్సీబీ సారథి
ఈ మ్యాచ్లో కోహ్లీసేనపై కింగ్స్ ఎలెవన్ పంజాబ్ 97 పరుగుల తేడాతో విజయం సాధించింది. 207పరుగుల లక్ష్యంతో బరిలో దిగిన ఆర్సీబీ 109కే ఆలౌట్ అయ్యింది. బౌలర్లలో రవి బిష్ణోయ్(3), మురుగన్ అశ్విన్(3) రాణించారు. పంజాబ్ జట్టు విజయంలో సారథి కేఎల్ రాహుల్(132) కీలక పాత్ర పోషించాడు. శతకంతో మెరిసి.. ఇన్నింగ్స్ను వన్ మ్యాన్ షోగా నడిపించాడు.
