ఐపీఎల్ ప్లేఆఫ్స్కు తమ జట్టు చేరడం చాలా సంతోషాన్నిచ్చిందని ముంబయి ఇండియన్స్ కెప్టెన్ రోహిత్ శర్మ అన్నాడు. టీమ్లోని ఆటగాళ్లు చేసిన కృషి వల్లే టోర్నీలో తాము నాకౌట్ దశకు చేరామని ముంబయి ఇండియన్స్ అధికారిక ట్విట్టర్లో హిట్మ్యాన్ తెలిపాడు.
"ఐపీఎల్ ప్లేఆఫ్స్కు మేము అర్హత సాధించాం. మా కృషి వల్లే ఇక్కడ వరకు వచ్చాం. టోర్నీలో ప్రస్తుతానికి ఓ గండాన్ని దాటాం. ఇక నాకౌట్ దశపై దృష్టి సారించాలి. సన్రైజర్స్ హైదరాబాద్తో మా జట్టుకు చివరి లీగ్ మ్యాచ్ ఉంది. అది మరో ముఖ్యమైన పోరు అవుతుంది. ప్రత్యర్థి గురించి ఆలోచించడం ఇష్టం లేదు. నిజాయతీగా మా ప్రదర్శన చేయడానికే వచ్చాం."
- రోహిత్శర్మ, ముంబయి ఇండియన్స్ కెప్టెన్
ఐపీఎల్ ప్రస్తుత సీజన్లో ఇప్పటివరకు 13 మ్యాచ్లు ఆడిన ముంబయి ఇండియన్స్ 9 మ్యాచ్ల్లో విజయం సాధించి 18 పాయింట్లను తమ ఖాతాలో వేసుకుంది. ఫలితంగా పాయింట్ల పట్టికలో అగ్రస్థానంలో నిలిచింది. దీంతో రోహిత్సేన ఫైనల్కు వెళ్లడానికి రెండు అవకాశాలున్నాయి. కాగా తన చివరి మ్యాచ్లో షార్జా వేదికగా నవంబరు 3న సన్రైజర్స్ హైదరాబాద్తో ముంబయి ఇండియన్స్ తలపడనుంది. వార్నర్సేన ప్లేఆఫ్స్కు చేరాలంటే ఈ మ్యాచ్ కచ్చితంగా గెలవాల్సిఉంటుంది.
కోలుకున్నాడు.. కానీ!
గాయం కారణంగా వైస్కెప్టెన్ రోహిత్శర్మను ఆస్ట్రేలియా పర్యటనకు సెలెక్టర్లు ఎంపిక చేయలేదు. కానీ, రోహిత్ ఫిట్నెస్పై వైద్యబృందం ఎల్లప్పుడూ పర్యవేక్షిస్తుందని భారత క్రికెట్ నియంత్రణ మండలి (బీసీసీఐ) వెల్లడించింది. ఆసీస్తో సిరీస్ కోసం రోహిత్ అందుబాటు గురించి ఓ బీసీసీఐ అధికారి మాట్లాడారు.
"ఆదివారం రోహిత్శర్మను మరోసారి పర్యవేక్షిస్తారు. ఆస్ట్రేలియా పర్యటనకు రోహిత్ అందుబాటులో ఉంటాడా? లేదా? అనే విషయంపై స్పష్టత వస్తుంది. గాయం నుంచి అతడు పూర్తిగా కోలుకున్నాడు. కానీ, హిట్మ్యాన్ మరికొంత విశ్రాంతి తీసుకోవాల్సి ఉంది" అని ఓ బీసీసీఐ అధికారి వెల్లడించారు.
ఐపీఎల్ పూర్తయిన తర్వాత టీమ్ఇండియా యూఏఈ నుంచి నేరుగా ఆస్ట్రేలియా బయలుదేరనుంది. దీనికోసం టెస్టు స్పెషలిస్టు చెతేశ్వర్ పుజారా, హనుమ విహారి ఇప్పటికే అక్కడికి చేరుకున్నారు.
