ఈ సీజన్ ఐపీఎల్లో ఆడిన 12 మ్యాచ్ల్లో చెరో ఐదింటిలో గెలిచి ప్లే ఆఫ్లో స్థానం కోసం పోటీ పడుతున్నాయి కోల్కతా నైట్ రైడర్స్ - కింగ్స్ ఎలెవెన్ పంజాబ్ జట్లు. నేడు ఈ రెండింటి మధ్య మొహాలి వేదికగా మ్యాచ్ జరగనుంది. రాత్రి 8 గంటలకు మ్యాచ్. ఈ మ్యాచ్లో ఓడిన జట్టు ప్లే ఆఫ్కు దాదాపు దూరమైనట్టే.
ఈ మ్యాచ్లో నెగ్గి చివరి మ్యాచ్లో ఓడినా... ఇందులో ఓడి తర్వాతి దాంట్లో నెగ్గినా ఇరు జట్ల నెట్ రన్రేట్ ఆధారంగా ఎక్కువ రన్రేట్ ఉన్న జట్టు ప్లే ఆఫ్కు వెళ్లే అవకాశముంది. టాప్-4 స్థానం కోసం 3 జట్లు (కోల్కతా, పంజాబ్, హైదరాబాద్) పోటీ పడుతున్నాయి. రాజస్థాన్ రాయల్స్, బెంగళూరు కూడా నామమాత్రంగా ఇంకా రేసులోనే ఉన్నాయి.
ఈ సీజన్ ప్రారంభంలో వరుసగా మ్యాచ్లు గెలిచిన కోల్కతా తర్వాత వెనుకబడింది. ఒకరిద్దరిపైనే ఎక్కువగా ఆధారపడుతూ.. సమష్టిగా రాణించడంలో విఫలమౌతుంది రైడర్స్ జట్టు. గత మ్యాచ్లో ముంబయిపై శుభమన్ గిల్(75), క్రిస్ లిన్(54), రసెల్(80) చెలరేగి జట్టుకు విజయాన్ని అందించారు. 12 మ్యాచ్లలో 486 పరుగులు చేసిన రసెల్ భీకరమైన ఫామ్లో ఉన్నాడు. మరోసారి అతడు బ్యాట్ ఝుళిపించాలని కోల్కతా అభిమానులు ఆశిస్తున్నారు. బ్యాటింగ్లో బలంగా కనిపిస్తున్నా.. బౌలింగ్లో కాస్త బలహీనంగా ఉంది కోల్కతా. నరైన్, పియూష్ చావ్లా స్థాయికి తగ్గ ప్రదర్శన చేయాల్సి ఉంది. పంజాబ్తో పోల్చుకుంటే రన్రేట్లో కొంచెం మెరుగ్గా ఉంది నైట్రైడర్స్.
బ్యాటింగ్లో రాహుల్, గేల్పైనే ఎక్కువ ఆధారపడుతోంది పంజాబ్. 12 మ్యాచ్లలో రాహుల్ 520 పరుగులు చేయగా.. గేల్ 448 రన్స్తో రాణించాడు. మిడిల్ ఆర్డర్లో మయాంక్ అగర్వాల్, నికోలస్ పూరన్, డేవిడ్ మిల్లర్ ఆకట్టుకోవాల్సి ఉంది. బౌలింగ్లో అశ్విన్, షమి స్థాయికి తగ్గ ప్రదర్శన చేయలేకపోతున్నారు. ఈ మ్యాచ్లో ఓడితే పంజాబ్ ప్లే ఆఫ్కు దూరమయ్యే అవకాశముంది. సొంతగడ్డపై మ్యాచ్ జరగనుండటం ఆ జట్టుకు కలిసొచ్చే అంశం.
జట్లు... (అంచనా)
కోల్కతా నైట్ రైడర్స్..
దినేశ్ కార్తీక్(కెప్టెన్, కీపర్), శుభ్మన్ గిల్, క్రిస్ లిన్, రసెల్, సునిల్ నరైన్, ఉతప్ప, నితీశ్ రాణా, రింకూ సింగ్, పియూష్ చావ్లా, సందీప్ వారియర్, హ్యారీ గుర్నే.
కింగ్స్ ఎలెవన్ పంజాబ్..
రవిచంద్రన్ అశ్విన్(కెప్టెన్), లోకేశ్ రాహుల్, క్రిస్ గేల్, మయాంక్ అగర్వాల్, నికోలస్ పూరన్, డేవిడ్ మిల్లర్, సిమ్రన్ సింగ్(కీపర్), మురుగన్ అశ్విన్, ముజిబర్ రహమాన్, షమి.
