సుదీర్ఘ ఫార్మాట్లో ప్రపంచకప్లా భావించిన ప్రపంచ టెస్ట్ ఛాంపియన్షిప్ను ఓటమితో ముగించింది టీమ్ఇండియా. తొలిసారి జరిగిన డబ్ల్యూటీసీ ఫైనల్లో విలియమ్సన్ నేతృత్వంలోని న్యూజిలాండ్ విజయం సాధించింది. రెండో విడత ప్రపంచ టెస్ట్ ఛాంపియన్షిప్లో భాగంగా వచ్చే రెండేళ్ల (2021-23)కు గానూ టీమ్ఇండియా షెడ్యూల్ వచ్చేసింది. ఇందులో భాగంగా మొత్తం 5 సిరీస్లు ఆడనుంది. ఇంగ్లాండ్తో సిరీస్తో ఈ సీజన్ మొదలు అవ్వనుండగా.. బంగ్లాతో సిరీస్తో దానికి ముగింపు పలకనుంది.
ప్రస్తుతం యూకే పర్యటనలో ఉన్న కోహ్లీసేనకు.. ఆగస్టు 4న ఇంగ్లాండ్తో జరిగే ఐదు టెస్ట్ల సిరీస్తో డబ్ల్యూటీసీ తదుపరి సీజన్ ప్రారంభం కానుంది. తర్వాత స్వదేశంలో న్యూజిలాండ్తో టెస్ట్ సిరీస్ ఆడనుంది భారత్. రూట్సేనతో సిరీస్ అనంతరం దుబాయ్ వేదికగా మిగిలిన ఐపీఎల్ సీజన్ ఆడనుంది. అనంతరం పొట్టి ప్రపంచకప్ జరగనుంది. దీని తర్వాత నవంబర్లో కివీస్తో సిరీస్ ఆడే అవకాశం ఉంది.
డిసెంబర్-జనవరిలో దక్షిణాఫ్రికా పర్యటనకు వెళ్లనుంది టీమ్ఇండియా. అనంతరం శ్రీలంకతో 3 టెస్ట్ల సిరీస్కు ఆతిథ్యమివ్వనుంది. తర్వాత సుదీర్ఘ ఫార్మాట్కు కొద్దిగా విరామం ఇవ్వనుంది కోహ్లీసేన. 2022 రెండో సగంలో బోర్డర్-గావస్కర్ ట్రోఫీలో భాగంగా ఆస్ట్రేలియాలో పర్యటించనుంది భారత్. ఇక చివరగా బంగ్లాతో జరిగే రెండు టెస్ట్ల సిరీస్తో డబ్ల్యూటీసీ రెండో ఎడిషన్ ముగియనుంది.
తొలి ఎడిషన్లో అంచనాలు అందుకుని ఫైనల్కు చేరుకున్న విరాట్ సేన.. తుదిపోరులో కివీస్ చేతిలో ఓటమి పాలైంది. రెండో విడతలోనూ ఇదే విధంగా రాణించాలని టీమ్ఇండియా యోచిస్తోంది. ఇక ఫైనల్లో ఏకైక మ్యాచ్ ఉండకూడదనే తన నిర్ణయాన్ని బహిరంగంగానే చెప్పాడు కోహ్లీ. దీంతో రానున్న ఎడిషన్లో ఐసీసీ ఏమైనా మార్పులు చేస్తుందేమో చూడాలి.
ఇదీ చదవండి: PSL: విజేతగా 'సుల్తాన్స్'.. ఐపీఎల్తో పోలిస్తే ప్రైజ్మనీ ఎంత?
డబ్ల్యూటీసీ రెండో విడత షెడ్యూల్..
ఇంగ్లాండ్ పర్యటనలో భాగంగా భారత్ ఐదు మ్యాచ్లు ఆడనుంది. ఈ సిరీస్తో డబ్ల్యూటీసీ రెండో ఎడిషన్ ప్రారంభం అవుతుంది.
- తొలి టెస్ట్: ఆగస్టు 4-8, ట్రెంట్ బ్రిడ్జ్.
- రెండో టెస్ట్: ఆగస్టు 12-16, లార్డ్స్.
- మూడో టెస్ట్: ఆగస్టు 25-29, హెడింగ్లీ.
- నాల్గో టెస్ట్: సెప్టెంబర్ 2-6, కెన్నింగ్టన్ ఓవల్.
- ఐదో టెస్ట్: సెప్టెంబర్ 10-14, ఓల్డ్ ట్రాఫోర్డ్.
స్వదేశంలో కివీస్తో టెస్ట్ సిరీస్కు భారత్ ఆతిథ్యమివ్వనుంది. ఇందులో రెండు మ్యాచ్లు ఆడనుంది. ఈ సిరీస్ నవంబర్లో జరిగే అవకాశాలున్నాయి.
డిసెంబర్-జనవరిలో దక్షిణాఫ్రికా పర్యటనకు వెళ్లనుంది టీమ్ఇండియా. అక్కడ 3 టెస్టులు ఆడనుంది.
శ్రీలంకతో 3 మ్యాచ్ల టెస్ట్ సిరీస్కు భారత్ ఆతిథ్యమివ్వనుంది.
రెండు టెస్ట్ల సిరీస్లో భాగంగా బంగ్లా పర్యటనకు వెళ్లనుంది టీమ్ఇండియా. డబ్ల్యూటీసీ రెండో విడతలో ఇదే చివరి సిరీస్.
ఇదీ చదవండి: Team India: కివీస్పై ఓటమి.. మారిన బీసీసీఐ ఆలోచన
