ఆస్ట్రేలియాతో డే/నైట్ టెస్టు జరగనున్న నేపథ్యంలో భారత స్పిన్నర్ కుల్దీప్ ఆసక్తికర వ్యాఖ్యలు చేశాడు. ఈ తరహా మ్యాచ్ల్లో బ్యాట్స్మెన్, స్పిన్ బౌలింగ్ను అర్థం చేసుకోవడం కష్టమని పేర్కొన్నాడు. ఈ పోరు కోసం ఎదురుచూస్తున్నట్లు చెప్పాడు.
"రాత్రి వేళలో స్పిన్నర్ల బౌలింగ్ శైలిని బ్యాట్స్మెన్ పసిగట్టలేరు. ఎందుకంటే వాళ్లు భిన్నంగా బంతులు విసిరేందుకు ప్రయత్నిస్తారు. దానిని బ్యాట్స్మెన్ అంత త్వరగా కనిపెట్టలేకపోవచ్చు. దీని వల్ల బౌలర్లకే మేలు. ఇతర దేశాల్లో పింక్ బాల్తో ఆడిన అనుభవం నాకు లేదు. అందుకే ఈ టెస్టులో ఎలా ఆడతానో అని ఆసక్తిగా ఎదురుచూస్తున్నాను"
-కుల్దీప్ యాదవ్, భారత స్పిన్నర్
ఆస్ట్రేలియాలో స్పిన్నర్లు పెద్దగా ప్రభావం చూపలేరనడం సరికాదని కుల్దీప్ అన్నాడు. పరిస్థితులను అర్థం చేసుకోగలిగితే వారు కూడా మెరుగైన ప్రదర్శన చేస్తారని తెలిపాడు. టీ20లతో పోలిస్తే టెస్టుల్లో వికెట్లు కోసం చాలా ఓపికగా ఉండాలని చెప్పాడు.
గత పర్యటనలో స్మిత్, వార్నర్ లేనంత మాత్రాన సిరీస్ గెలిచేమనడం సరికాదని కుల్దీప్ తెలిపాడు. టెస్టు జట్టులో ఎప్పుడు అవకాశం లభించినా సరే పూర్తిస్థాయిలో ప్రదర్శన చేసి, జట్టును గెలిపించేందుకు ప్రయత్నిస్తానని చెప్పాడు. అదే తనకు సంతోషాన్నిస్తుందని అన్నాడు.
ఇదీ చదవండి:జనవరి నుంచి దేశవాళీ పోరు.. మొదటగా ఆ టోర్నీనే
