లార్డ్స్ టెస్టులో భారత టెయిలెండర్లు అద్భుతమే చేశారు. షమీ- బుమ్రా జోడీ తొమ్మిదో వికెట్కు పరుగుల వరద పారించారు. ఇంగ్లాండ్ బౌలర్లను సమర్థవంతంగా ఎదుర్కొంటూ భారత్ను పటిష్ట స్థితికి చేర్చారు. దీంతో ఐదో రోజు లంచ్ సమయానికి కోహ్లీసేన రెండో ఇన్నింగ్స్లో ఎనిమిది వికెట్ల నష్టానికి 286 పరుగులు చేసింది. ఇంగ్లాండ్ ముందు 259 పరుగుల లక్ష్యంతో కొనసాగుతోంది. ఇక మ్యాచ్లో ఫలితం వచ్చే అవకాశాలు కనిపించడం లేదు. చివరి రోజు మిగిలిన ఓవర్లలో లక్ష్యాన్ని ఛేదించడం రూట్ సేనకు కష్టంతో కూడినదనే చెప్పాలి.
181/6తో ఐదో రోజు ఆట మొదలుపెట్టిన కోహ్లీసేనకు ఆదిలోనే ఎదురుదెబ్బ తగిలింది. ఫోర్ కొట్టి ఊపు మీద కనిపించిన పంత్ను రాబిన్సన్ బోల్తా కొట్టించాడు. అతడి బౌలింగ్లో కీపర్ క్యాచ్గా వెనుదిరిగాడు. అనంతరం క్రీజులోకి వచ్చిన షమీ.. ఇషాంత్తో కలిసి కాస్త సమయం బ్యాట్ ఝళిపించాడు. ఈ జంట చివర్లో స్కోరు బోర్డు వేగం పెంచేందుకు ప్రయత్నించారు. సరిగ్గా ఆ సమయంలోనే ఇషాంత్ను రాబిన్సన్ వికెట్ల ముందు దొరకబుచ్చుకున్నాడు.
బుమ్రా- షమీ భాగస్వామ్యం..
తొమ్మిదో వికెట్గా క్రీజులోకి వచ్చిన బుమ్రా.. షమీతో కలిసి ఇన్నింగ్స్ను చక్కబెట్టే ప్రయత్నం చేశాడు. ఈ జోడీ డిఫెన్స్తో పాటు చూడచక్కని షాట్లతో అలరించింది. అనవసరపు షాట్లకు పోకుండా చెత్త బంతుల్ని బౌండరీకి తరలించారు. ప్రస్తుతానికి తొమ్మిదో వికెట్కు 87 పరుగులు జోడీంచారు. ఈ క్రమంలోనే షమీ తన అర్ధసెంచరీ పూర్తి చేసుకున్నాడు. ప్రస్తుతం షమీ 52*, బుమ్రా 30* పరుగులతో క్రీజులో ఉన్నారు.
