లార్డ్స్ టెస్టు నాలుగో రోజు ఆట ముగిసే సమయానికి టీమ్ఇండియా 6 వికెట్ల నష్టానికి 181 పరుగులు చేసింది. ప్రస్తుతం 154 పరుగుల ఆధిక్యంలో ఉంది కోహ్లీసేన. క్రీజులో రిషభ్ పంత్ (14*), ఇషాంత్ శర్మ (4*) నిలిచారు. ఇంగ్లాండ్ బౌలర్లలో మార్క్ వుడ్ 3, మొయిన్ అలీ 2 వికెట్లతో రాణించారు.
105/3తో టీ విరామానికి వెళ్లిన టీమ్ఇండియా చివరి సెషన్లో ధాటిగా ఆడే ప్రయత్నం చేసింది. పుజారా- రహానె జంట నాలుగో వికెట్కు సెంచరీ భాగస్వామ్యం నమోదు చేశారు. తర్వాతి బంతికే వుడ్ బౌలింగ్లో స్లిప్స్లో దొరికిపోయాడు పుజారా. మరికాసేపటికే పుజారా, జడేజాను మొయిన్ అలీ వెనక్కి పంపాడు. దీంతో 155/3తో పటిష్టంగా ఉన్న టీమ్ఇండియా 175/6కి మారిపోయింది. 82 ఓవర్ల వద్ద ఆటను నిలిపివేస్తున్నట్లు అంపైర్లు ప్రకటించారు. ఇక చివరి రోజు తొలి సెషన్ను పూర్తిగా ఆడితే ఈ టెస్టు డ్రా అయ్యే అవకాశాలు ఉంటాయి.
పుజారా- రహానె భాగస్వామ్యం..
నాలుగో రోజు ఆటలో పుజారా- రహానె ఆటే హైలైట్. గత కొద్ది కాలంగా పేలవ ఫామ్తో సతమతమవుతున్న వీరిద్దరూ ఎట్టకేలకు గాడిలో పడ్డారు. జట్టుకు అవసరమైన పరిస్థితిలో బ్యాట్కు పని చెప్పారు. అసలు సిసలైన టెస్టు బ్యాటింగ్ను బయటకు తీశారు. జట్టును సురక్షిత స్థితికి చేర్చారు. దాదాపు 50 ఓవర్ల పాటు బ్యాటింగ్ చేశారు ఈ ద్వయం. మంచి ఊపు మీద కనిపించిన పుజారా.. ఓ అనవసరపు షాట్కు పోయి ఔట్ అయ్యాడు. 206 బంతులు ఆడి 45 పరుగులు చేసిన నయావాల్.. ఇంగ్లాండ్ బౌలర్లకు కొరకరాని కొయ్యగా మారాడు. అతనికి మరో ఎండ్లో రహానె చక్కటి సహకారం అందించాడు.
