ఆస్ట్రేలియాలో జరుగుతున్న టీ20 ప్రపంచకప్ రసవత్తరంగా సాగుతోంది. క్రికెట్ ప్రేమికులు ప్రతి మ్యాచ్ను ఎంతో ఆసక్తిగా తిలకిస్తున్నారు. ఇప్పటికే భారత్ రెండు మ్యాచుల్లో నెగ్గి.. దక్షిణాఫ్రికాతో జరిగిన మ్యాచ్లో భారత్ ఓటమి పాలైంది. బుధవారం బంగ్లాదేశ్ను ఢీకొనేందుకు సిద్ధమైంది. అయితే, టీ20 ప్రపంచకప్లో ఓపెనింగ్‌ సమస్య భారత్‌ను వెంటాడుతోంది. ఇప్పటి వరకు ఆడిన మూడు మ్యాచ్‌ల్లో రోహిత్ శర్మ, కేఎల్ రాహుల్ జోడీ.. తొలివికెట్కు 41 పరుగులు మాత్రమే చేశారు. దీంతో మిడిల్ ఆర్డర్‌పై ఒత్తిడి పెరిగింది.
రెండో మ్యాచ్లో నెదర్లాండ్స్‌పై రోహిత్.. కష్టంగా అర్ధశతకం సాధించాడు. ఆ తర్వాత మ్యాచ్లో తేలిపోయాడు. ఇక రాహుల్ మాత్రం ఫామ్లోకి వచ్చేందుకు తంటాలు పడుతున్నాడు. మూడు మ్యాచ్‌ల్లో 22 పరుగులు మాత్రమే చేశాడు. ఒక్క ఇన్నింగ్స్లోనూ రెండంకెల స్కోరు చేయలేదు. దీంతో రాహుల్ ఆటతీరుపై సోషల్ మీడియాలో తీవ్ర విమర్శలు వ్యక్తమవుతున్నాయి. అటు వెన్నునొప్పి కారణంగా దినేశ్ కార్తీక్.. దక్షిణాఫ్రికాతో జరిగిన మ్యాచ్ మధ్యలోనే వెళ్లిపోయాడు. దీంతో ఆ స్థానంలో రిషభ్ పంత్ కీపింగ్ చేశాడు. ఈ పరిణామాల మధ్య బంగ్లాతో మ్యాచ్కు ముందు టీమ్ఇండియా కోచ్ ద్రవిడ్ భారత ఆటగాళ్లపై ఆసక్తికర వ్యాఖ్యలు చేశాడు.
"దక్షిణాఫ్రికాతో జరిగిన మ్యాచ్లో దినేశ్ కార్తీక్ వెన్నునొప్పితో ఇబ్బంది పడ్డాడు. దాని వల్ల మ్యాచ్ నుంచి మధ్యలోనే వెళ్లిపోవాల్సివచ్చింది. బౌన్సర్ను అందుకోవడానికి చాలా ఎత్తుకు ఎగిరాడు. దీనికారణంగానే అతని వెనుక భాగానికి గాయమైవుండొచ్చని భావిస్తున్నాను. ప్రస్తుతం తన గాయం కాస్త నయమైందని అనుకుంటున్నా. బంగ్లాతో జరిగే మ్యాచ్లో కార్తీక్ను ఆడించాలా లేదా అన్న విషయంపై రేపు(బుధవారం నిర్ణయం తీసుకుంటాం" అని ద్రవిడ్ పేర్కొన్నాడు.
"కేఎల్ రాహుల్ అద్భుతమైన ఆటగాడు. అతడి గత రికార్డులను చూస్తే అది అర్థమైపోతుంది. అతడు చాలా బాగా బ్యాటింగ్ చేయగలడు. అయితే టీ20ల్లో తీవ్ర ఒత్తిడి ఉంటుంది. రాహుల్ బలంగా పుంజుకుంటాడని మాకు నమ్మకం ఉంది. ఇటువంటి పరిస్థితులు ఓపెనర్లకు సవాలు విసురుతాయి. మేము కేఎల్ రాహుల్కు పూర్తి మద్దతునిచ్చాము. ఆటపై అతడు ఎంత ప్రభావం చూపగలడో నాకు తెలుసు" అని రాహుల్ను వెనకేసుకొచ్చాడు ద్రవిడ్.
ఇదీ చదవండి: న్యూజిలాండ్-బంగ్లాదేశ్తో టూర్‌.. కెప్టెన్లుగా హార్దిక్, ధావన్
బంగ్లాదేశ్తో మ్యాచ్.. దినేశ్ కార్తీక్ వర్సెస్ పంత్.. ఆడేది ఎవరో?
