ఆగస్టు నెలకు సంబంధించి 'ప్లేయర్ ఆఫ్ ది మంత్' (icc player of the month) నామినీలను ప్రకటించింది అంతర్జాతీయ క్రికెట్ మండలి (ICC). ప్రపంచవ్యాప్తంగా మెరుగైన ప్రదర్శన చేసే ఆటగాళ్లను గుర్తించి ప్రతి నెల వారికి అవార్డులను ఇచ్చే కార్యక్రమాన్ని ఈ ఏడాది జనవరి నుంచి ప్రారంభించింది ఐసీసీ. అందులో భాగంగానే ఆగస్టు నెల కోసం టాప్ ఆటగాళ్ల పేర్లను వెల్లడించింది.
"పురుషుల క్రికెట్లో టీమ్ఇండియా పేసర్ జస్ప్రీత్ బుమ్రా, పాకిస్థాన్ పేసర్ షాహిన్ అఫ్రిది, ఇంగ్లాండ్ కెప్టెన్ జో రూట్ పోటీలో నిలిచారు. మహిళల క్రికెట్లో ఐర్లాండ్కు చెందిన క్రికెటర్లు గాబీ లూయిస్, ఈమియర్ రిచర్డ్సన్తో పాటు థాయ్లాండ్కు చెందిన నట్టాయా బూచాతమ్ పేర్లను పరిగణలోకి తీసుకున్నాం."
- అంతర్జాతీయ క్రికెట్ మండలి(ఐసీసీ)
ఇంగ్లాండ్తో జరిగిన తొలి టెస్టులో టీమ్ఇండియా పేసర్ జస్ప్రిత్ బుమ్రా 9 వికెట్లు పడగొట్టాడు. లార్డ్స్ వేదికగా జరిగిన రెండో టెస్టులో అద్భుతమైన బ్యాటింగ్తో రాణించాడు. అలాగే ఇంగ్లాండ్ కెప్టెన్ జోరూట్.. టీమ్ఇండియాతో జరుగుతున్న టెస్టు సిరీస్లో 105.81 సగటుతో 528 పరుగులు చేశాడు. వీరితో పాటు పాకిస్థాన్ పేసర్ షాహిన్.. వెస్టిండీస్తో జరిగిన టెస్టు సిరీస్ మొత్తంగా 18 వికెట్లు పడగొట్టి 'ప్లేయర్ ఆఫ్ ది మంత్' అవార్డు రేసులో నిలిచాడు.
ఇదీ చూడండి.. టీ20 ప్రపంచకప్ ముందు పాకిస్థాన్ జట్టుకు షాక్
