ICC New Rule: టీ20 క్రికెట్కు మరింత మజా తీసుకొచ్చేందుకు ఐసీసీ నడుం బిగించింది. ఈ ఫార్మాట్లో తాజాగా ఓ కొత్త నిబంధనలు తీసుకొచ్చింది. ఇందులో స్లో ఓవర్ రేట్కు సంబంధించిన ఈ రూల్ చాలా కీలకమైంది. ఇప్పటివరకు స్లో ఓవర్ రేట్కు కారణమైతే కెప్టెన్, ఆటగాళ్ల జీతాల్లో కోతలు విధించేవారు. అయితే ఇకపై మరో కొత్త నిబంధనను జట్టు భరించాల్సి ఉంటుంది.
కొత్త రూల్ ఏం చెబుతోంది..
ఫీల్డింగ్ చేసే జట్టు ఇన్నింగ్స్ చివరి ఓవర్ తొలి బంతిని నిర్దేశిత సమయానికే బౌలింగ్‌ చేయాల్సి ఉంటుంది. అలా వేయకపోతే ఆ తర్వాత ఎన్ని ఓవర్లు (లేదా బంతులు) మిగిలినా.. 30 అడుగుల వృత్తం వెలుపల ఉన్న ఫీల్డర్లలో ఒకరిని తగ్గించాల్సి ఉంటుంది. అంటే సాధారణంగా ఐదుగురు ఫీల్డర్ల బదులు నలుగురిని మాత్రమే 30 యార్డ్ సర్కిల్ అవతల అనుమతిస్తారు.
ఇన్నింగ్స్ మొదలయ్యే సయమంలో ఫీల్డ్ అంపైర్.. ఫీల్డింగ్ సైడ్తో పాటు బ్యాటింగ్ సైడ్ కెప్టెన్లకు షెడ్యూల్ సమయాన్ని వివరిస్తారు.
డ్రింక్స్ బ్రేక్
ద్వైపాక్షిక సిరీస్‌ల్లోనూ ఇకపై టీ20 క్రికెట్‌లో డ్రింక్స్ విరామ సమయాల్లో ఐసీసీ కొత్త సడలింపు ఇచ్చింది. టోర్నీ ప్రారంభానికి ముందే ఇరు జట్ల అంగీకారం మేరకే ఇన్నింగ్స్ మధ్యలో ఆప్షనల్‌ డ్రింక్స్ బ్రేక్‌గా రెండున్నర నిమిషాలు విరామం తీసుకునే వీలు కల్పించింది.
జనవరి 16న వెస్టిండీస్-ఐర్లాండ్ మధ్య జరగబోయే మొదటి టీ20తో ఈ నిబంధనలు అమల్లోకి రానున్నాయి. అలాగే వెస్టిండీస్-దక్షిణాఫ్రికా మహిళా జట్ల మధ్య జనవరి 18 నుంచి జరగబోయే టీ20 సిరీస్ నుంచి మహిళల టీ20ల్లోనూ ఈ నిబంధనలు అమలు చేయనున్నారు.
