విచారణకు రండి - అల్లుఅర్జున్‌కు చిక్కడపల్లి పోలీసుల నోటీసులు

అల్లు అర్జున్‌కు నోటీసులు పంపిన చిక్కడపల్లి పోలీసులు - సంధ్య థియేటర్ తొక్కిసలాట ఘటనలో నేడు విచారణకు రావాలని వెల్లడి

Police Send Notice To Allu Arjun : సంధ్య థియేటర్​ తొక్కిసలాట ఘటనపై చిక్కడపల్లి పోలీసులు దర్యాప్తు ముమ్మరం చేశారు. ఈ కేసులో విచారణ కోసం A-11గా ఉన్న హీరో అల్లు అర్జున్​కు నోటీసులు పంపారు. ఈరోజు ఉదయం 11 గంటలకు విచారణకు హాజరు కావాలని నోటీసుల్లో పేర్కొన్నారు. అల్లు అర్జున్​కు తొక్కిసలాట ఘటనపై హైకోర్టు బెయిల్ మంజూరు చేసింది. అయితే దర్యాప్తు చేసుకునేందుకు పోలీసులకు అనుమతి ఇచ్చింది. ఈ నేపథ్యంలోనే పోలీసులు నోటీసులు జారీ చేసినట్లు సమాచారం. నోటీసులపై అల్లు అర్జున్ తన లాయర్లతో చర్చించినట్లు తెలుస్తోంది.

శనివారం అసెంబ్లీలో సంధ్య థియేటర్ ఘటనపై ముఖ్యమంత్రి ప్రకటన చేశారు. దీనికి కౌంటర్​గా అదే రోజు తన నివాసంలో అల్లు అర్జున్ ప్రెస్​మీట్ నిర్వహించడంతో ఈ అంశం మరోసారి రాష్ట్రంలో హాట్​టాపిక్​గా మారింది. అసెంబ్లీలో ముఖ్యమంత్రి చేసిన తన వ్యాఖ్యలను అల్లు అర్జున్ తప్పుపట్టారు. తొక్కిసలాట గురించి తనకు మరుసటి రోజు వరకు తెలియదని, తన క్యారెక్టర్​ను తక్కువ చేసే కుట్రలు జరుగుతున్నాయని ఆరోపించారు. అల్లు అర్జున్ చేసిన కామెంట్లకు కౌంటర్​గా నిన్న సిటీ పోలీస్ కమిషనర్ సీవీ ఆనంద్ నిన్న మీడియా సమావేశం నిర్వహించి మరీ ఆ రోజు ఏం జరిగిందో కూలంకుశంగా వివరించారు. దీనికి సంబంధించిన వీడియోను కూడా విడుదల చేశారు. ఇప్పుడు తాజాగా చిక్కడపల్లి పోలీసులు విచారణకు రావాలని అల్లు అర్జున్​కు నోటీసులు జారీచేశారు.

శ్రీతేజ్​కు మైత్రీ మూవీ మేకర్స్ ఆర్థికసాయం : మరోవైపు ఇవాళ పుష్ప-2 సినిమాను నిర్మించిన మైత్రీ మూవీ మేకర్స్ నిర్మాత నవీన్.. తొక్కిసలాటలో గాయపడి కిమ్స్​ ఆసుపత్రిలో చికిత్స పొందుతున్న శ్రీతేజ్​ను పరామర్శించారు. మంత్రి కోమటిరెడ్డి వెంకట్​ రెడ్డితో కలిసి వెళ్లిన నవీన్.. శ్రీతేజ్ కుటుంబానికి 50లక్షల రూపాయల చెక్కును అందించారు. శ్రీతేజ్ త్వరగా కోలుకోవాలని ఆకాంక్షించారు. మరోవైపు నిన్న అల్లు అర్జున్ ఇంటిపై దాడికి దిగిన ఓయూ జేఏసీకి చెందిన ఆరుగురికి బెయిల్ మంజూరైంది.