వచ్చే ఏడాది బర్మింగ్హామ్ వేదికగా జరగనున్న కామన్వెల్త్ క్రీడల్లో.. మహిళ క్రికెట్ నుంచి ఆరు అర్హత జట్లను వెల్లడించింది అంతర్జాతీయ క్రికెట్ మండలి(ఐసీసీ). కామన్వెల్త్ గేమ్స్ సమాఖ్యతో కలిసి అధికారిక ప్రకటన చేసింది. 2022 జులై 28 నుంచి ఆగష్టు 8 వరకు ఈ ప్రతిష్టాత్మక పోటీలు జరగనున్నాయి.
ఈ పోటీల కోసం మొత్తం 8 జట్లను ప్రకటించాల్సి ఉంది. క్రీడలకు ఆతిథ్యమిస్తున్నందుకు ఇంగ్లాండ్.. క్రికెట్ నుంచి స్థానం దక్కించుకుంది. ఆస్ట్రేలియా, ఇండియా, న్యూజిలాండ్, పాకిస్థాన్, దక్షిణాఫ్రికాతో పాటు వెస్టిండీస్ నుంచి ఓ జట్టు ఈ అర్హత జట్లలో స్థానం దక్కించుకున్నాయి. వీటన్నింటినీ 2021 ఏప్రిల్ 1 వరకు టీ20ల్లో ఉన్న ర్యాంకుల ఆధారంగా నిర్ణయించారు. మరో టీమ్ను వచ్చే ఏడాది జనవరి 31న ప్రకటించనున్నారు.
ఇదీ చదవండి: 'ఆటగాళ్లు నిష్క్రమిస్తున్నా.. ఐపీఎల్ కొనసాగుతుంది'
ఇప్పటివరకు 22 సార్లు కామన్వెల్త్ క్రీడలను నిర్వహించగా.. అందులో క్రికెట్ భాగమవ్వడం ఇది రెండో సారి మాత్రమే. 1998లో కౌలాలంపుర్లో జరిగిన ఈవెంట్లో పరుషుల క్రికెట్కు అవకాశం లభించింది. అప్పుడు ఆస్ట్రేలియాతో జరిగిన ఫైనల్లో దక్షిణాఫ్రికా విజయం సాధించి.. గోల్డ్ మెడల్ను కైవసం చేసుకుంది.
ఇదీ చదవండి: 'పీఎం కేర్స్'కు ఆసీస్ పేసర్ కమిన్స్ విరాళం
