Misbah-ul-Haq 2007 worldcup: అది 2007 సెప్టెంబరు 24. దక్షిణాఫ్రికా వాండరర్స్ స్టేడియం వేదికగా జరిగిన తొలి టీ20 ప్రపంచకప్ టోర్నీ ఫైనల్. ఆ రోజును క్రికెట్ అభిమానులు ఎప్పటికీ మర్చిపోలేరు. ఎందుకంటే ఎంతో ఉత్కంఠంగా సాగిన ఆ మ్యాచ్ చివరి ఓవర్లో గెలుపు దోబూచులాడి చివరకు భారత్కు వరించింది. నిజానికి పాక్ బ్యాటర్ మిస్బా ఉల్ హక్ అదిరిపోయే ఇన్నింగ్స్ ఆడి విజయానికి చాలా దగ్గరకు తీసుకొచ్చాడు. అయితే అనూహ్య రీతిలో తన ఫేవరెట్ స్కూప్ షాట్ ఆడి ఔట్ అయ్యాడు. తాజాగా ఓ ఇంటర్వ్యూలో పాల్గొన్న అతడు ఆ టీ20 టోర్నీలో తాను ఔటైన తీరుపై స్పందించాడు. అత్మవిశ్వాసం ఎక్కువై ఔటైనట్లు వివరించాడు.
"2007లో ప్రతి మ్యాచుల్లో స్కూప్ షాట్తో ఎన్నో ఫోర్లు బాదాను. ఆస్ట్రేలియాపై కూడా ఆ షాట్తో బాగా ఆడాను. స్పిన్నర్లపై మంచి ప్రదర్శన చేశాను. కానీ ఫైనల్లో ఆ బంతి బాదేటప్పుడు నాలో ఆత్మవిశ్వసం ఎక్కువైంది. దీంతో బంతిని కొట్టే టైమింగ్ తప్పింది. అందుకే ఔట్ అయ్యాను" అని మిస్బా చెప్పాడు.
157 పరుగుల లక్ష్య ఛేదనలో పాకిస్థాన్ తడబడింది. షాహిద్ అఫ్రిది, యూనిస్ ఖాన్, మాలిక్ వంటి దిగ్గజ బ్యాటర్లను టీమ్ఇండియా బౌలర్లు త్వరగా పెవిలియన్ చేర్చారు. కానీ మిస్బా ఉల్ హక్ మాత్రం ధనాధన్ ఇన్నింగ్స్ ఆడి విజయానికి చాలా దగ్గరకు తీసుకొచ్చాడు. ఇక పాక్ గెలుపు ఖాయమని అభిమానులు భావించారు. ఆ జట్టుకు చివరి ఓవర్లో 13 పరుగలు మాత్రమే అవసరం. ఆ ఓవర్లో జోగిందర్ శర్మ వేసిన రెండో బంతిని సిక్సర్గా మలిచి భారత్ గెలుపు ఆశలపై నీళ్లు చల్లాడు. ఇక మూడో బంతికి స్కూప్ షాట్ ఆడబోయి శ్రీశాంత్ చేతికి క్యాచ్ ఇచ్చి ఔట్ అయ్యాడు. దీంతో భారత్ ఐదు పరుగుల తేడాతో గెలిచింది.
ఇదీ చూడండి:
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
