ఇండోర్ వేదికగా జరిగిన మూడో టెస్ట్ మ్యాచ్లో ఘోర పరాజయాన్ని చవి చూసింది టీమ్ ఇండియా. గత రెండు టెస్టుల్లో మంచి విజయాన్ని సాధించిన భారత్.. మూడో టెస్ట్లో తొమ్మిది వికెట్ల తేడాతో ఓటమిపాలయ్యింది. మూడో రోజు తొలి సెషన్లో 18.3 ఓవర్లు ఆడిన ఆస్ట్రేలియా టీమ్.. కేవలం ఒక్క వికెట్ మాత్రమే కోల్పోయి విజయాన్ని ముద్దాడింది. దీంతో ఇక టీమ్ ఇండియా జట్టు ఇరకాటంలో పడ్డట్లే అని విశ్లేషకులు అంటున్నారు.
ఐసీసీ వరల్డ్ టెస్ట్ ఛాంపియన్ షిప్ ఫైనల్ రేసులో ఉన్న టీమ్ ఇండియా.. ఒక వేళ ఈ ఇండోర్ టెస్ట్ మ్యాచ్లో విజయాన్ని సాధించి ఉంటే ఈజీగా ఫైనల్స్లో తన స్థానాన్ని ఖరారు చేసుకుని ఉండేది. కానీ అలా జరగలేదు. అయితే ఆస్ట్రేలియా మాత్రం ఈ విజయంతో ఎటువంటి ఇబ్బంది లేకుండా జూన్ 7 నుంచి 11 వరకు లండన్ వేదికగా జరగనున్న వరల్డ్ టెస్ట్ ఛాంపియన్ షిప్ ఫైనల్కు బెర్త్ ఖరారు చేసుకుంది.
టీమ్ ఇండియాకు దారేది?.. ఇప్పటికే ఈ ఘోర పరాభవంతో కుంగిపోయిన టీమ్ ఇండియా ఇప్పుడు డబ్ల్యూటీసీ ఫైనల్కు చేరుకోవాలంటే రెండు మార్గాలు ఉన్నాయి. అహ్మదాబాద్ వేదికగా మార్చి 9 నుంచి జరగనున్న నాలుగో టెస్టులో ఆస్ట్రేలియా జట్టును చిత్తు చిత్తుగా ఓడించాలి. అప్పుడే ఈ చిక్కుల్లో నుంచి భారత్ బయటపడే ఛాన్స్ ఉంది. అయితే ఒక వేళ ఈ మ్యాచ్లోనూ టీమ్ ఇండియా ఓటమిపాలైతే ఫైనల్స్కు చేరుకునేందుకు మరో దారి ఉంది.
అదేంటంటే.. ఇక్కడ టీమ్ఇండియా భవితవ్యం న్యూజిలాండ్- శ్రీలంక టెస్టు సిరీస్పై ఆధారపడి ఉంటుంది. మార్చి 9 నుంచి 21 వరకు జరిగే ఈ రెండు మ్యాచుల సిరీస్లో లంక జట్టును కనీసం ఒక్క మ్యాచులో ఓడిపోవాలి లేదా డ్రా చేసుకోవాలి. అలా టీమ్ ఇండియా రెండో ఆఫ్షన్తో ఫైనల్కు చేరుకోగలదు. మరోవైపు 2021-23 ఐసీసీ వరల్డ్ టెస్టు ఛాంపియన్షిప్ పాయింట్ల పట్టికలో 68.52 శాతం విజయాలతో ఆస్ట్రేలియా టాప్ ప్లేస్ను సొంతం చేసుకుంది. ఇక టీమ్ ఇండియా 60.29 శాతంతో రెండో స్థానానికి పరిమితమయ్యింది. శ్రీ లంక టీమ్ 53.33 శాతం విజయాలతో మూడో స్థానాన్ని కైవసం చేసుకుంది.
'ఓడినప్పుడే ఇవన్నీ గుర్తొస్తాయా'..
మూడో టెస్ట్ ఓటమి తర్వాత కెప్టెన్ రోహిత్ శర్మ స్టేడియం పిచ్పై పలు సంచలన కామెంట్స్ చేశాడు. అంతే కాకుండా ఇటువంటి పిచ్పైనే తాము ఆడాలని ఎప్పుడో నిర్ణయించుకున్నామంటూ వ్యాఖ్యానించాడు. "ఇలాంటి పిచ్లపై ఆడాలన్నది సమష్టిగా తీసుకున్న నిర్ణయం. మేము బ్యాటర్లపై తీవ్ర ఒత్తిడి పెట్టదలచుకోలేదు. అయితే గెలిచినప్పుడు బ్యాటింగ్ గురించి ఎవరూ మాట్లాడరు. ఓడిపోయినప్పుడే ఇలాంటివన్ని చర్చకు వస్తాయి. ఓ జట్టుగా మేము ఇలాంటి పిచ్ లపైనే ఆడాలని అనుకున్నాం" అని రోహిత్ తేల్చి చెప్పాడు.
