కరోనా కారణంగా వాయిదా పడిన భారత్-ఇంగ్లాండ్ చివరి టెస్టుపై(IND vs ENG 5th Test) క్లారిటీ వచ్చేసింది. ఈ టెస్టు మ్యాచ్ను వచ్చే ఏడాది జులైలో నిర్వహించనున్నట్లు ఇంగ్లాండ్ క్రికెట్ బోర్డు(ECB News) తమ అధికారిక ప్రకటనలో పేర్కొంది. పరిమిత ఓవర్ల సిరీస్ కోసం టీమ్ఇండియా జట్టు ఇంగ్లాండ్ పర్యటించనున్న నేపథ్యంలో ఈ మ్యాచ్ జరగనున్నట్లు తెలిపింది.
"భారత్-ఇంగ్లాండ్ మధ్య ఐదు మ్యాచ్ల టెస్టు సిరీస్లో 2-1తో టీమ్ఇండియా ఆధిక్యంలో ఉంది. కరోనా కారణంగా వాయిదాపడిన ఈ సిరీస్ చివరి టెస్టు మ్యాచ్ వచ్చే ఏడాది జులై 1 నుంచి ప్రారంభం అవుతుంది. ఎడ్జ్బాస్టన్ వేదికగా ఈ మ్యాచ్ నిర్వహించాలని ఇంగ్లాండ్ అండ్ వేల్స్ క్రికెట్ బోర్డు(ఈసీబీ), భారత క్రికెట్ నియంత్రణ మండలి(బీసీసీఐ) మధ్య అంగీకారం కుదిరింది" అని ఈసీబీ స్పష్టం చేసింది.
మాంచెస్టర్(Manchester Test) వేదికగా ఈ మ్యాచ్ జరగాల్సి ఉంది. కానీ, ఈసీబీ ప్రస్తుతం వేదికను మారుస్తూ కీలక నిర్ణయం తీసుకుంది. ఈ మ్యాచ్ కోసం అప్పటికే టికెట్లు కొన్నవారికోసం తగిన ఏర్పాట్లు చేయనున్నట్లు ఈసీబీ తెలిపింది. మ్యాచ్ను వీక్షించేందుకు వీలుకాని అభిమానులకు టికెట్ డబ్బులు తిరిగి ఇచ్చే ఏర్పాట్లు కూడా ఎడ్జ్బాస్టన్ మైదానం యాజమాన్యం చూసుకుంటుందని పేర్కొంది.
టీమ్ఇండియా హెడ్ కోచ్ రవిశాస్త్రి, ఇతర సహాయ సిబ్బందిలో కొంత మందికి కొవిడ్ పాజిటివ్గా నిర్ధరణ అయిన కారణంగా ఈ సిరీస్ ఐదో టెస్టు మ్యాచ్ వాయిదా పడింది.
ఇదీ చదవండి:
