న్యూజిలాండ్తో రెండో టెస్టులో ఇంగ్లాండ్ ఘన విజయం సాధించి సిరీస్ను దక్కించుకుంది. 299 పరుగుల లక్ష్యాన్ని ఇంగ్లాండ్ బ్యాటర్లు సునాయాసంగా ఛేదించిన తీరును చూసి క్రికెట్ అభిమానులు ఆశ్చర్యపోయారు. గతేడాది జనవరి 2021 తర్వాత ఇంగ్లాండ్ సిరీస్ గెలవడం ఇదే తొలిసారి. ఈ నేపథ్యంలో ఈ విజయం ఇంగ్లీష్ జట్టులో కొత్త జోష్ నింపిందని అనుకుంటాం! కానీ, నిజానికి ఈ సిరీస్తో ఆ జట్టుకు ఎదురుదెబ్బ తగిలింది. ప్రపంచ టెస్టు ఛాంపియన్షిప్లో పాయింట్లను కోల్పోవడమే కాక.. ఆటగాళ్లు తమ మ్యాచ్ ఫీజులోంచి 40 శాతాన్ని జరిమానాగా చెల్లించుకోవాల్సి వచ్చింది.
స్లో ఓవర్ రేట్: కివీస్తో జరిగిన రెండో మ్యాచ్లో స్లో ఓవర్ రేటును నమోదు చేసింది ఆతిథ్య ఇంగ్లాండ్ జట్టు. నిర్ణీత సమయంలో వేయాల్సిన వాటికంటే రెండు ఓవర్లు తక్కువ వేసింది. ఈ నేపథ్యంలో మ్యాచ్ రిఫరీ రిచీ రిచర్డ్సన్.. ప్రపంచ టెస్టు ఛాంపియన్షిప్ టేబుల్లో ఇంగ్లాండ్కు రెండు పాయింట్ల కోత విధిస్తున్నట్లు ప్రకటించాడు. దీంతో ఈ విజయంతో 42కు చేరిన జట్టు పాయింట్లు మళ్లీ 40కి పడిపోయాయి. అంతేకాదు.. ఆటగాళ్ల మ్యాచ్ ఫీజు నుంచి 40 శాతం జరిమానా చెల్లించాలని ఆదేశించాడు. ఐసీసీ నిబంధనల ప్రకారం ఈ నిర్ణయం తీసుకున్నట్లు తెలిపాడు. మూడు టెస్టుల సిరీస్లో ఇప్పటికే 2-0తో ఆధిక్యంలో ఉంది ఇంగ్లాండ్. చివరిదైన మూడో టెస్టు జూన్ 23-27 మధ్య జరగనుంది.
ఇదీ చూడండి : బీసీసీఐ నయా ప్లాన్.. ఇకపై 'వన్ నేషన్ టూ టీమ్స్'గా!
