దక్షిణాఫ్రికా క్రికెట్ బోర్డు వచ్చే ఏడాది సౌతాఫ్రికా టీ20 లీగ్తో ముందుకు రానుంది. అయితే ఇది పేరుకే ప్రొటిస్ లీగ్ అయినా ఇందులో పాల్లొనబోయే ఆరు జట్లను ఐపీఎల్ ఫ్రాంచైజీలే కొనుగోలు చేయడం విశేషం. అయితే ఇందులో జోహన్నెస్బర్గ్ జట్టును చెన్నై సూపర్కింగ్స్ సొంతం చేసుకుంది. ఈ నేపథ్యంలో సీఎస్కే యాజమాన్యం ధోనీని తమ మెంటార్గా నియమించనున్నట్లు ప్రచారం సాగుతోంది. మరోవైపు ఈ లీగ్లో భారత ఆటగాళ్లు భాగం కానున్నారా? అనే సందేహాలు ఎక్కువయ్యాయి.
అయితే ఈ విషయంపై ఓ బీసీసీఐ అధికారి స్పందించారు. భారత ఆటగాళ్లు ఎవరూ విదేశీ లీగ్‌లలో ఆడే అవకాశం లేదని స్పష్టం చేశారు. ఒకవేళ ఎవరైనా అలా ఆడాలని కోరుకుంటే అన్ని ఫార్మాట్ల నుంచి రిటైర్మెంట్ అయ్యాకే ఆడే ఛాన్స్‌ ఉంటుందని చెప్పారు.
"అన్ని ఫార్మాట్ల నుంచి వైదొలిగేంత వరకు ఏ భారత క్రికెటర్‌ ఇతర లీగ్‌లలో ఆడకూడదు. ఎవరైనా రానున్న లీగ్‌లలో ఆడాలని కోరుకుంటే బీసీసీఐ పర్మిషన్ లేదా అన్ని ఫార్మాట్ల నుంచి రిటైర్మెంట్ ప్రకటించాకే అతడికి ఆ అవకాశం ఉంటుంది" అని సదరు అధికారి స్పష్టం చేశారు. కాగా, ఈ సౌతాఫ్రికా లీగ్లో కేప్‌టౌన్‌ ఫ్రాంచైజీని ముంబయి ఇండియన్స్‌, జోహన్నెస్‌బర్గ్‌ను చెన్నై సూపర్కింగ్స్, డర్బన్‌ను లక్నో సూపర్ జెయింట్స్‌, పోర్ట్‌ ఎలిజబెత్‌ను సన్‌రైజర్స్‌ హైదరాబాద్, ప్రిటోరియాను దిల్లీ క్యాపిటల్స్‌, పర్ల్‌ను రాజస్థాన్‌ రాయల్స్‌ సొంతం చేసుకున్నాయి.
ఇదీ చూడండి: చరిత్ర సృష్టించిన తెలంగాణ రెజ్లర్ నిఖిల్‌
