ప్రపంచకప్లో లీగ్ దశలోనే నిష్క్రమించడం వల్ల పాకిస్థాన్ క్రికెట్ బోర్డు కీలక పదవులకు సెగ తగిలింది. ప్రస్తుతం పాక్ చీఫ్ సెలక్టర్గా ఉన్న ఇంజమామ్ ఉల్‌ హఖ్‌ తన పదవి నుంచి బుధవారం వైదొలిగాడు. ఒకవేళ బోర్డు ఆదేశిస్తే మరేదైనా పదవీ బాధ్యతలు చేపట్టేందుకు సిద్ధంగా ఉన్నట్లు వెల్లడించాడు.
ఇంజమామ్ పదవీ కాలం జులై 31తో ముగియనుంది. అయితే తన ఒప్పందాన్ని పొడగించుకొనేందుకు ఆయన సుముఖంగా లేనట్లు లాహోర్లోని మీడియా సమావేశంలో చెప్పుకొచ్చాడు.
" మూడేళ్లకు పైగా చీఫ్ సెలక్టర్గా పనిచేశా. ప్రస్తుతం ఒప్పందాన్ని పునరిద్ధరించుకొనే ఆలోచన లేదు. సెప్టెంబర్‌లో ఐసీసీ టెస్టు ఛాంపియన్‌షిప్‌, 2020లో ఐసీసీ టీ20 వరల్డ్కప్, 2023లో ఐసీసీ వన్డే ప్రపంచకప్ జరగనున్నాయి. ఇన్ని మెగా ఈవెంట్లు ఉన్న సమయంలో పాకిస్థాన్ క్రికెట్ బోర్డు కొత్త చీఫ్ సెలక్టర్ను నియమించుకొంటే బాగుటుందని భావిస్తున్నా. తాజా ఆలోచనలతో ప్రయోగాలు చేసేందుకు వచ్చే వ్యక్తికి అవకాశం ఉంటుంది. పీసీబీ ఛైర్మన్ ఇషాన్ మనీ, మేనేజింగ్‌ డైరెక్టర్‌ వసీమ్ ఖాన్‌ను కలిసి మాట్లాడాను. అవకాశం ఇచ్చిన అందరికీ ధన్యవాదాలు తెలిపాను ".
--ఇంజమామ్, పాక్ చీఫ్ సెలక్టర్
జట్టు విజయాల కోసం ఎంతో కృషి చేసినా ఫలితాలు పెద్దగా ప్రతిబింబించలేదని మాట్లాడాడు ఇంజమామ్. అభిమానులు అర్థం చేసుకుంటారని ఆశిస్తూ... గడ్డుకాలం ఎదురైనా సారథి సర్ఫరాజ్‌, కోచ్‌ మికీ ఆర్థర్‌తో కలిసి ఒకే దిశగా పనిచేసినట్లు చెప్పుకొచ్చాడీ మాజీ పాక్ కెప్టెన్.
ప్రపంచకప్లో పాక్ జట్టు పేలవ ప్రదర్శనకు బోర్డు, సెలక్షన్‌ కమిటీ నిర్ణయాలే కారణమని ఆ దేశవ్యాప్తంగా తీవ్ర విమర్శలు వచ్చాయి. ఇంజమామ్ అధ్యక్షుడిగా జట్టు కూర్పుపై సరిగ్గా దృష్టి సారించలేదని అభిప్రాయాలు వ్యక్తమయ్యాయి. ఫలితంగానే 2016వ సంవత్సరం మధ్యలో అధ్యక్ష బాధ్యతలు చేపట్టిన ఇంజమామ్... దాదాపు మూడేళ్లకు ఆ పదవికి గుడ్బై చెప్పేశాడు.
