వయసు నాలుగేళ్లే. కానీ బ్యాట్ పట్టాడంటే ప్రొఫెషనల్ క్రికెటర్ స్థాయిలో చెలరేగుతున్నాడు. స్ట్రయిట్ డ్రైవ్, కవర్ డ్రైవ్‌లతో ఔరా అనిపిస్తున్నాడు. ఆ చిన్నోడే చెన్నైకి చెందిన సనుష్ సూర్యదేవ్. చిన్నవయసులోనే తన బ్యాటింగ్తో ప్రముఖుల ప్రశంసలు అందుకుంటున్నాడు. జూనియర్ ధోనీ అంటూ మన్ననలు అందుకుంటున్నాడు.
రికార్డుల్లో చోటు
ప్రస్తుతం ఎల్‌కేజీ చదువుతున్న సనుష్... 2 సంవత్సరాల వయసు నుంచే క్రికెట్ ఆడుతున్నాడు. రెండున్నరేళ్ల అప్పుడే పలు రికార్డులు సొంతం చేసుకున్నాడు. అత్యంత పిన్నవయస్కుడైన ప్రొఫెషనల్ క్రికెటర్‌గా.. ఆసియా బుక్‌ ఆఫ్ రికార్స్‌లో చోటు సంపాదించాడు. దేశంలోని తక్కువ వయుసున్న క్రికెటర్‌గా.. ఇండియా బుక్‌ ఆఫ్ రికార్డ్స్‌లోనూ పేరు లిఖించుకున్నాడు.
ఎడమచేతి వాటం బ్యాట్స్‌మెన్ అయిన సనుష్... లెఫ్టార్మ్ బౌలింగ్ చేయగలడు. టీమిండియా మాజీ కెప్టెన్ ధోనీ అభిమాని అయిన ఈ బుడతడు... మిస్టర్ కూల్ను కలిసి ప్రశంసలూ అందుకున్నాడు. తాజాగా గూగుల్‌లో సనుష్ సూర్యదేవ్ ఆటను చూసిన కేంద్ర క్రీడాశాఖ మంత్రి కిరణ్ రిజిజు... చిన్నారిని పిలిపించి ప్రశంసించారు. తమ కుమారుడి ప్రతిభ పట్ల మురుగన్‌రాజ్, సుబత్రా దంపతులు సంతోషం వ్యక్తం చేస్తున్నారు.
