టీమిండియాలో ప్రేమ పక్షులు అంటే టక్కున గుర్తొచ్చే పేరు విరాట్-అనుష్క. ఈ జాబితాలోకి ఇప్పుడు కొత్తగా హార్దిక్-నటాషా చేరారు. అయితే వీరిందరి కంటే ముందే ఓ బాస్కెట్బాల్ క్రీడాకారిణిని తొలిచూపులోనే ప్రేమించి, పెళ్లి చేసుకున్నాడు ఇషాంత్ శర్మ. ఈ విషయాన్నే, ఇటీవలే జరిగిన ఓ ఇంటర్వ్యూలో చెప్పాడు.
"2011లో నా స్నేహితుడు బాస్కెట్బాల్ ఈవెంట్ నిర్వహించాడు. నన్ను ముఖ్య అతిథిగా పిలిచాడు. అప్పుడే ప్రతిమను చూశా. ఆ క్షణమే పెళ్లి చేసుకోవాలని ఫిక్స్ అయిపోయా. అప్పటి నుంచి ఆమె ఆడే ప్రతిమ్యాచ్కు తప్పకుండా వెళ్లేవాడిని. నాకు కొంచెం సిగ్గుగా అనిపించేది. కానీ, ఆ సమయంలో కనీసం తనతో మాట్లాడలేకపోయాను. దాదాపు ఏడాది ఇలానే గడిచిపోయింది. అప్పుడు ఆస్ట్రేలియా సిరీస్కు వెళ్లే ముందు ఓ ముఖ్యమైన విషయం మాట్లాడాలని తనతో అన్నా. ఆ తర్వాత లవ్ ప్రపోజ్ చేశా"
- ఇషాంత్ శర్మ, టీమిండియా పేసర్
ఇషాంత్ తన ప్రేమను ప్రతిమకు వ్యక్తపరిచిన తర్వాత, దాదాపు ఐదేళ్ల పాటు వీరిద్దరూ డేటింగ్ చేశారు. అనంతరం పెద్దల అంగీకారంతో 2016 డిసెంబరు 9న పెళ్లి చేసుకున్నారు.
గత కొన్నేళ్ల నుంచి టీమిండియా తరఫున టెస్టులో నిలకడగా రాణిస్తున్నాడు ఇషాంత్. ఇటీవలే న్యూజిలాండ్ పర్యటనలోనూ ఓ మ్యాచ్లో ఐదు వికెట్లతో సత్తా చాటాడు. గత నవంబర్లో భారత్ ఆడిన తొలి గులాబీ బంతి టెస్టులోనూ ఐదు వికెట్లు తీసి, ఈ ఘనత సాధించిన తొలి బౌలర్గా నిలిచాడు.
ఇదీ చూడండి.. 'ఐపీఎల్కు ఇస్తున్న ప్రాధాన్యం రంజీలకు ఇవ్వడం లేదు'
