గురువారం నుంచే ప్రతిష్ఠాత్మక ప్రపంచ టెస్ట్ ఛాంపియన్షిప్ అధికారికంగా ప్రారంభమైంది. ఇంగ్లాండ్ - ఆస్ట్రేలియా మధ్య జరుగుతున్న యాషెస్ సిరీస్తో ఈ దీర్ఘకాల టోర్నీ మొదలైంది. ఇటీవలే ముగిసిన వరల్డ్కప్ టై అవడం వల్ల బౌండరీ కౌంట్ ద్వారా విజేతను నిర్ణయించారు. మరి టెస్ట్ ఛాంపియన్షిప్ ఫైనల్ మ్యాచ్ టైగా ముగిస్తే విజేతగా ఎవరు నిలుస్తారన్నది అందరిని తొలుస్తున్న ప్రశ్న.
ఐసీసీ టెస్ట్ ర్యాంకింగ్స్లో టాప్-9లో ఉన్న జట్లు ఈ ఛాంపియన్షిప్లో పాల్గొననున్నాయి. 2021 మార్చి 31 వరకు 27 టెస్టు సిరీస్లు ఆడనున్నాయి. పాయింట్ల ఆధారం టాప్ రెండు స్థానాల్లో నిలిచిన జట్లు ఫైనల్కు చేరతాయి. ఈ సిరీస్లో ఒక్కో జట్టు స్వదేశంలో 3, విదేశాల్లో 3 సిరీస్లు ఆడుతుంది.
పాయింట్ల కేటాయింపు ఇలా..
ఒక్కో సిరీస్కు గరిష్ఠంగా 120 పాయింట్లు ఉంటాయి. ఈ పాయింట్లను ఆడే మ్యాచ్ల సంఖ్య ఆధారంగా విభజిస్తారు. ఉదాహరణకు ఒక్క సిరీస్లో రెండు టెస్టులుంటే.. ఒక్కో మ్యాచ్కు 60 పాయింట్లు కేటాయిస్తారు. గెలిచిన జట్టు మొత్తం పాయింట్లు సొంతం చేసుకుంటుంది. టై అయితే ఇరు జట్లకు చెరో సగం పాయింట్లు(30, 30) లభిస్తాయి. మ్యాచ్ డ్రాగా ముగిస్తే(రెండు జట్ల స్కోరు సమమైతే) 3:1 నిష్పత్తిలో పాయింట్లు కేటాయిస్తారు. ఓడితే ఎలాంటి పాయింట్లు రావు.
ఫైనల్ మ్యాచ్ టై అయితే..
పాయింట్ల ఆధారంగా టాప్ రెండు జట్లు తుదిపోరుకు అర్హత సాధిస్తాయి. ఫైనల్ మ్యాచ్ టై అయితే ఇరు జట్లను ఉమ్మడి ఛాంపియన్లుగా ప్రకటిస్తారు. వాతావరణ పరిస్థితులు అనుకూలించక మ్యాచ్ నిర్వహించడం కుదరకపోతే రిజర్వ్ డే ఉంటుంది. ఐదు రోజుల్లో కనీసం ఆడాల్సిన సమయంలో మ్యాచ్ ఆడటం కుదరకపోతే అప్పుడు రిజర్వే డేకు అవకాశముంటుంది.
కనీసం ఆడాల్సిన సమయం రోజుకు ఆరు గంటలు చొప్పున ఐదు రోజుల్లో 30 గంటలు ఉంటుంది. ఉదాహరణకు వర్షం కురిసి ఓ రోజు ఆడటం కుదరకపోతే.. మిగిలిన రోజుల్లో అదనపు గంటలు నిర్వహించేందుకు ప్రయత్నిస్తారు. ఉదాహరణకు నాలుగు రోజుల్లో మూడు గంటలు మాత్రమే అదనంగా ఆడితే.. మిగిలిన మూడు గంటలను రిజర్వ్ డేకు కొనసాగిస్తారు.
టెస్ట్ ఛాంపియన్షిప్స్లో ఒక్కో జట్టు ఇంట, బయట కలిపి ఆరు సిరీస్లు ఆడుతుంది. దాదాపు రెండేళ్ల పాటు ఈ ఛాంపియన్షిప్ కొనసాగనుంది.
ఇది చదవండి: టెస్టు ఛాంపియన్షిప్:2 ఏళ్లు సాగే క్రికెట్ యాత్ర
