రాబోయే మహిళల వన్డే ప్రపంచకప్ గురించి మాట్లాడిన ఆస్ట్రేలియా కెప్టెన్ మెగ్ లానింగ్.. ఆ సమయానికి తాము సిద్ధంగానే ఉంటామని చెప్పింది. న్యూజిలాండ్ వేదికగా ఈ టోర్నీ జరగనుంది. ఓ క్రీడాకారిణిగా, ప్రస్తుత పరిస్థితులు త్వరగా చక్కదిద్దుకోవాలని కోరుకుంటున్నట్లు తెలిపింది. అయితే నిర్వహకులు తీసుకునే నిర్ణయం కోసం ఎదురుచూస్తున్నట్లు వెల్లడించింది.
"టోర్నీ నిర్వహణపై ఐసీసీ ఆలోచిస్తోంది. ఎందుకంటే ప్రపంచకప్నకు సిద్ధమయ్యేందుకు అన్ని జట్లకు తగినంత సమయం ఉందా? ఇంకా కొన్ని క్వాలిఫైయింగ్ మ్యాచ్లు జరగాలి. ఈ పరిస్థితి ఎలా చక్కదిద్దుకుంటుందో చూడాలి. దీనితో పాటే ప్రపంచకప్ జరుగుతుందా లేదా అని సందేహాలు వస్తున్నాయి. ఓ క్రీడాకారిణిగా నేనైతే టోర్నీ అనుకున్న ప్రకారం జరగాలనే అనుకుంటాను. కానీ నిర్వహకులు ఏ నిర్ణయం తీసుకున్నా నాకు సమ్మతమే"
-మెగ్ లానింగ్, ఆస్ట్రేలియా కెప్టెన్
ఇటీవలే మాట్లాడిన ఐసీసీ చీఫ్ మను సావ్నే.. ఆడే ప్రతి ఒక్కరి ఆరోగ్యం, భద్రతే తమకు తొలి ప్రాధాన్యమని అన్నారు. షెడ్యూల్ ప్రకారం మేలో అర్హత టోర్నీ జరగాలి. కరోనా వల్ల అదికాస్త జులైకు వాయిదా పడింది. ఇందులో భాగంగా ప్రపంచకప్లోని మిగిలిన మూడుస్థానాల కోసం బంగ్లాదేశ్, పాకిస్థాన్, ఐర్లాండ్, వెస్టిండీస్, థాయ్లాండ్, జింబాబ్వే, పపువా న్యూగినియా, యూఎస్ఏ, నెదర్లాండ్స్ పోటీపడనున్నాయి.
