ప్రపంచకప్లో టీమిండియాకు ఇది కలవరపరిచే అంశం. ఫేవరెట్లలో ఒకటైన భారత్.. శనివారం ఓవల్ వేదికగా జరిగిన ప్రాక్టీస్ మ్యాచ్లో న్యూజిలాండ్ చేతిలో ఆరు వికెట్ల తేడాతో ఓడింది. బ్యాట్స్మెన్ ఘోరంగా విఫలమయ్యారు. ఒక్క జడేజా మినహా మరెవరూ చెప్పుకోదగ్గ స్కోరు సాధించలేకపోయారు. బౌలర్లూ ప్రభావం చూపించలేకపోయారు.
180 పరుగుల లక్ష్యంతో బరిలోకి దిగిన కివీస్.. మొదట్లోనే మన్రో వికెట్ను కోల్పోయింది. ఆ తర్వాత కొద్ది సేపటికే గప్తిల్ పెవిలియన్ చేరాడు.
కివీస్ జోడీ హిట్
అనంతరం క్రీజులోకి వచ్చిన టేలర్, కెప్టెన్ విలియమ్సన్తో కలిసి నిలకడగా ఆడాడు. ఈ క్రమంలో ఇద్దరు అర్ధసెంచరీలు పూర్తి చేసుకున్నారు. మూడో వికెట్కు 114 పరుగుల భాగస్వామ్యం నెలకొల్పారు. లక్ష్యానికి చేరువవుతున్న వేళ 67 పరుగుల వ్యక్తిగత స్కోరు వద్ద విలియమ్సన్ ఔటయ్యాడు. గెలిచేందుకు మరో పరుగు చేయాల్సిన సమయంలో 71 పరుగులు చేసిన టేలర్ పెవిలియన్ బాట పట్టాడు. తర్వాతి బ్యాట్స్మెన్ లాంఛనాన్ని పూర్తి చేశారు.
టీమిండియా బౌలర్లలో బుమ్రా, హార్దిక్ పాండ్య, చాహల్, జడేజా తలో వికెట్ తీశారు.
అంతకు ముందు టాస్ గెలిచి బ్యాటింగ్ ఎంచుకున్న కోహ్లీసేన.. ఆకట్టుకోలేకపోయింది. ఇన్నింగ్స్ ప్రారంభం నుంచి ప్రత్యర్థి జట్టులోని బౌలర్లు కచ్చితమైన లైన్ అండ్ లెంగ్త్తో బౌలింగ్ చేశారు. పరుగులు చేసేందుకు భారత బ్యాట్స్మెన్ కష్టపడ్డారు. వరుసగా వికెట్లు సమర్పించుకున్నారు. ఒక్క జడేజా మినహా బ్యాట్స్మెన్ అందరూ విఫలమయ్యారు. హార్దిక్ పాండ్య కొద్ది సేపు క్రీజులో నిలిచినా 30 పరుగులు చేసి నీషమ్ బౌలింగ్లో ఔటయ్యాడు.
జడేజా నిలబడ్డాడు.. పరువు కాపాడాడు
లోయర్ ఆర్డర్లో వచ్చిన జడేజా అనూహ్యంగా కివీస్ బౌలర్లపై చెలరేగాడు. సమయోచితంగా ఆడుతూ గౌరవప్రదమైన స్కోరు చేయడంలో కీలక పాత్ర పోషించాడు. 50 బంతుల్లో 54 పరుగులు చేసి తొమ్మిదో వికెట్గా వెనుదిరిగాడు.
మిగతా బ్యాట్స్మెన్లో రోహిత్ 2, ధావన్ 2, కోహ్లీ18, రాహుల్ 6, హార్దిక్ 30, ధోని 17, దినేశ్ కార్తిక్ 4, భువనేశ్వర్ 1, షమి 2, కుల్దీప్ 19 పరుగులు చేశారు.
న్యూజిలాండ్ బౌలర్లలో బౌల్ట్ 4 వికెట్లు దక్కించుకోగా, నీషమ్ 3, సౌతీ, గ్రాండ్హమ్, ఫెర్గ్యూసన్ తలో వికెట్ తీశారు.
