భారత క్రికెట్ జట్టులో విరాట్-ధోనీ జోడీకి విపరీతంగా అభిమానులు ఉంటారు. వీరిద్దరూ కలిసి బరిలోకి దిగితే ఏ దేశాన్నైనా ఓడించగల సత్తా ఉందని వీక్షకులు నమ్ముతారు. ప్రత్యర్థిపై ఎత్తులకు పైఎత్తులు వేస్తూ ఒకరు మిస్టర్ కూల్గా కనిపిస్తే... మరొకరు తనదైన ఆట, ఆవేశంతో మైదానంలో తోటి క్రికెటర్లలో స్ఫూర్తిని రగిలిస్తాడు. అలాంటి ఈ ద్వయం మైదానంలో కనిపిస్తేనే వీక్షకులు గోల చేస్తారు. మరి భావోద్వేగంతో ట్వీట్ చేస్తే ఊరుకుంటారా? ప్రతి ఒక్కరూ కనెక్ట్ అవుతారు. అందుకే కోహ్లీ ఈ ఏడాది చేసిన ఓ ట్వీట్ను.. అత్యధికంగా రీట్వీట్ చేశారు. ఫలితంగా ఇది 2019 టాప్ స్పోర్ట్స్ ట్వీట్గా నిలిచింది.
ధోనీ పుట్టినరోజు సందర్భంగా ఫొటో, కొన్ని మాటలను జతచేర్చి ట్వీట్ చేశాడు విరాట్ కోహ్లీ. అందులో మహీతో తనకున్న అనుబంధాన్ని పంచుకున్నాడు.
" హ్యాపీ బర్త్డే మహీ భాయ్.. కొద్ది మంది మాత్రమే నమ్మకం, గౌరవాన్ని అర్థం చేసుకోగలరు. ఇన్నేళ్ల పాటు నీతో స్నేహం చేస్తూ కొనసాగిన నా ప్రయాణాన్ని చాలా అదృష్టంగా భావిస్తున్నా. మా అందరికీ నువ్వు ఒక పెద్ద అన్నలాంటివాడివి. అంతేకాదు నువ్వు నాకెప్పటికీ కెప్టెన్వే"
-- విరాట్ కోహ్లీ, భారత జట్టు సారథి
వెస్టిండీస్తో మూడో టీ20 కోసం సిద్ధమవుతున్నాడు కెప్టెన్ విరాట్. ఈ బుధవారం ముంబయి వేదికగా ఈ మ్యాచ్ జరగనుంది. ఇప్పటికే మూడు మ్యాచ్ల సిరీస్ 1-1తో సమమైంది.
ఇటీవలే ధోనీ రీఎంట్రీ గురించి మాట్లాడాడు టీమిండియా ప్రధాన కోచ్ రవిశాస్త్రి. వచ్చే ఏడాది ఐపీఎల్లో ఆడతాడని ఆ తర్వాత ఫిట్గా ఉంటే భారత జట్టులోకి వస్తాడని అభిప్రాయపడ్డాడు.
ప్రపంచకప్లో న్యూజిలాండ్తో జరిగిన సెమీఫైనల్లో మహీ చివరగా ఆడాడు. ఆ టోర్నీ ముగిసిన తర్వాత పారా మిలటరీ దళంతో కలిసి పనిచేశాడు. అనంతరం వెస్టిండీస్, దక్షిణాఫ్రికా, బంగ్లాదేశ్ సిరీస్లకు దూరంగా ఉన్నాడు.
