భారత జట్టు మాజీ ఫిట్నెస్ కోచ్ శంకర్ బసుపై కెప్టెన్ విరాట్ కోహ్లీ ప్రశంసలు కురిపించాడు. తాను ఇంత ఫిట్గా మారడానికి కారణం అతడేనని తెలిపాడు. భారత ఫుట్బాల్ ప్లేయర్ సునీల్ ఛెత్రితో కలిసి ఇన్స్టాగ్రామ్ లైవ్ సెషన్లో పాల్గొన్న కోహ్లీ ఈ విషయాన్ని వెల్లడించాడు.
"నేను ఫిట్గా ఉండటానికి ప్రధాన కారణం మాజీ ఫిట్నెస్ కోచ్ శంకర్ బసు. రాయల్ ఛాలెంజర్స్ బెంగళూరులో ఉన్నప్పుడు వెయిట్ లిఫ్టింగ్ను పరిచయం చేశాడు. అది చేయడానికి నేను కొంత సంశయించాను. అప్పుడు నాకు వెన్నెముక నొప్పిగానూ ఉండేది. కానీ మూడు వారాల్లో దాని ఫలితం చూసి నేను ఆశ్చర్యపోయాను. దాని తర్వాత తినే డైట్పై దృష్టి సారించాను. ఏదేమైనా దేశం కోసం ఆడే ఆటలో ఉన్మాదిలా కష్టపడాలి.. అలా చేయలేకపోతే జట్టు నుంచి వైదొలగాలి". - విరాట్ కోహ్లీ, టీమ్ఇండియా కెప్టెన్
పోర్చుగీస్ ఫుట్బాల్ స్టార్ క్రిస్టియానో రొనాల్డో మనస్తత్వం తనకు స్ఫూర్తినిస్తుందని తెలిపాడు కోహ్లీ. భార్య అనుష్క శర్మను ఆదర్శంగా తీసుకుని శాకాహారిగా మారిన కోహ్లీ అంతర్జాతీయ క్రికెట్లో అత్యధిక పరుగులు సాధించడం సహా జట్టులో అత్యుత్తమ ఆటగాడిగా కొనసాగుతున్నాడు.
ఇదీ చూడండి.. వచ్చే నెల నుంచి దేశవాళీ టోర్నీలు ప్రారంభం!
