ఐసీసీ నియమావళిని ఉల్లంఘించిన కారణంగా టీమ్ఇండియా కెప్టెన్ విరాట్ కోహ్లీ.. ఓ మ్యాచ్ నిషేధం ఎదుర్కొనే అవకాశం ఉంది. సోమవారం జరిగిన రెండో టెస్టులో అంపైర్ నితిన్ మీనన్తో కోహ్లీ గొడవ పెట్టుకోవడమే అందుకు కారణమని తెలుస్తోంది.
ఏం జరిగిందంటే?
రెండో టెస్టు మూడో రోజు చివరి సెషన్లో అక్షర్ పటేల్ వేసిన బౌలింగ్లో ఇంగ్లాండ్ కెప్టెన్ జో రూట్ ఎల్బీడబ్ల్యూగా భారత జట్టు అప్పీల్ చేసింది. బంతి రూట్ ప్యాడ్కు వెనుక భాగంలో తగిలిన తర్వాత కీపర్ రిషబ్ పంత్ క్యాచ్ పట్టాడు. అయితే దీనిపై అంపైర్ నితిన్ మేనన్ నాటౌట్గా ప్రకటించాడు. దీంతో టీమ్ఇండియా రివ్యూకు వెళ్లింది. అయితే అందులో బంతి బ్యాట్కు తగిలిన ఆనవాలు కనిపించలేదు. సమీక్షలో ఆఫ్ స్టంప్స్కు బంతి తాకినట్లు చూపించింది. కానీ, అంపైర్స్ కాల్ మూలంగా ఆ నిర్ణయం ఇంగ్లాండ్కు అనూకూలంగా మారింది. దీంతో అంపైర్పై టీమ్ఇండియా కెప్టెన్ విరాట్ కోహ్లీ ఆగ్రహానికి గురయ్యి.. నితిన్ మేనన్తో గొడవకు దిగాడు.
ఉల్లంఘనకు శిక్ష
ఐసీసీ రాజ్యాంగంలో ఆర్టికల్ 2.8 ప్రకారం మైదానంలో అంపైర్లతో వాగ్వివాదం పెట్టుకున్నా.. లేదా అంపైర్ నిర్ణయాన్ని వ్యతిరేకిస్తూ గొడవకు దిగినా.. ఈ నిబంధన కింద సదరు క్రికెటర్పై ఐసీసీ చర్యలు తీసుకునే అధికారం ఉంది. ఈ నేపథ్యంలో అంపైర్తో గొడవకు దిగిన కోహ్లీ.. శిక్షగా లెవల్-1 నుంచి లెవల్-2 ఆటగాడిగా దిగజారడం సహా నాలుగు డీ-మెరిట్ పాయింట్లు ఇచ్చే అవకాశం ఉంది. కోహ్లీ పేరు మీద ఇప్పటికే రెండు డీ-మెరిట్ పాయింట్లు ఉన్నాయి. 24 నెలల్లో ఈ డీ-మెరిట్ పాయింట్లు నాలుగుకు చేరితే సదరు క్రికెటర్ ఒక టెస్టు లేదా రెండు వన్డే/టీ20లకు సస్పెండ్కు గురయ్యే అవకాశం ఉంది.
ఇదీ చూడండి: 'టెస్టు ఫార్మాట్కు అండగా పింక్-బాల్ క్రికెట్'
