ఆస్ట్రేలియాతో జరిగిన తొలి టెస్టులో ఘోరపరాభవం ఎదుర్కొంది టీమ్ఇండియా. దీంతో జట్టుపై తీవ్ర విమర్శలు వస్తున్నాయి. మాజీల్లో కొంతమంది కోహ్లీసేనకు మద్దతుగా నిలుస్తుంటే మరికొందరు ఘాటైన వ్యాఖ్యలు చేస్తున్నారు. తాజాగా ఈ ఓటమిపై స్పందించిన మాజీ క్రికెటర్ సునీల్ గావస్కర్ తప్పుల్ని సరిదిద్దుకుని రెండో మ్యాచ్లో సత్తాచాటాలని సూచించాడు. అలాగే జట్టులో కొన్ని మార్పులు చేయాల్సిన అవసరం ఉందని తెలిపాడు.
"తొలి మ్యాచ్లో ప్రదర్శన పట్ల నిరాశ చెందడం మామూలే. కానీ క్రికెట్లో ఏమైనా జరగొచ్చు. ఈ సంగతిని గుర్తించి రెండో మ్యాచ్పై దృష్టిపెట్టాలి. ఆసీస్ బ్యాటింగ్ లైనప్ కూడా అంత బలంగా ఏమీ లేదు. రెండో మ్యాచ్ కోసం భారత జట్టు బ్యాటింగ్ ఆర్డర్లో రెండు మార్పులు జరుగుతాయని అనుకుంటున్నా. పృథ్వీ షా స్థానంలో కేఎల్ రాహుల్ ఓపెనర్గా రావాలి. అలాగే 5 లేదా 6వ స్థానంలో శుభ్మన్ గిల్ను తీసుకునే అవకాశం ఉంది. వీరిద్దరూ మంచి ఫామ్లో ఉన్నారు. వారు కనుక మెరుగైన ప్రదర్శన చేస్తే పరిస్థితి భిన్నంగా ఉంటుంది."
-సునీల్ గావస్కర్, టీమ్ఇండియా మాజీ క్రికెటర్
అలాగే జట్టులో మార్పులపై మేనేజ్మెంట్ దృష్టిపెడుతుందని భావిస్తున్నట్లు తెలిపాడు గావస్కర్. ఎవరు ఓపెనర్గా రావాలో, ఎవరో మిడిలార్డర్లో రావాలో అనే విషయాన్ని వీలైనంత త్వరగా నిర్ణయించుకోవాలని సూచించాడు.
