టీమ్ఇండియా క్రికెట్ కిట్ల స్పాన్సర్షిప్ హక్కులను పొందేందుకు ప్రముఖ జర్మన్ స్పోర్ట్స్ బ్రాండ్ 'ప్యూమా' ఆసక్తి చూపిస్తోంది. అయితే, ప్యూమాకు ధీటుగా అడిడాస్ కూడా రంగంలోకి దిగే అవకాశాలున్నట్లు బీసీసీఐ అధికారిక వర్గాలు తెలిపాయి. 2016 నుంచి ఇప్పటి వరకు స్పాన్సర్గా వ్యవహించిన నైక్.. ఈ సారి బిడ్డింగ్లో పాల్గొనటంపై ఇంకా స్పష్టత లేదని వెల్లడించారు.
"లక్ష రూపాయల విలువైన ఇన్విటేషన్ టు టెండర్(ఐటీటీ) పత్రాన్ని ప్యూమా కొనుగోలు చేసింది. అయితే బిడ్డింగ్ పత్రాలను చేజిక్కించుకుంటే.. వారికే ఈ స్పాన్సర్షిప్ సొంతమని కాదు. ఈ విషయంలో ప్యూమా నమ్మకమైన ఆసక్తిని కనబరుస్తోంది."
-బీసీసీఐ అధికారి
అడిడాస్ కూడా ఈ విషయంలో ఆసక్తిగా ఉందని.. అయితే, స్పాన్సర్షిప్ హక్కుల కోసం బిడ్డింగ్ వేయడంపై ఇంకా స్పష్టత లేదని పేర్కొన్నారు.
ప్రస్తుత ఆర్థిక సంక్షోభ సమయంలో స్పాన్సర్షిప్ విషయంలో తలెత్తిన సమస్యలపై.. ఓ పరిశ్రమకు చెందిన సీనియర్ అధికారి ఒకరు మాట్లాడుతూ.. "ఈ ఐదేళ్ల ఒప్పందానికి కొత్త స్పాన్సర్ రూ. 200 కోట్లు చెల్లిస్తే ఆశ్చర్యపోనవసరం లేదు. ఈ మొత్తం గతంలో నైక్ చెల్లించిన దానికంటే తక్కువే" అని పేర్కొన్నారు. గతంలో ఒక్కో మ్యాచ్కు బీసీసీఐ రూ.88లక్షలు మూల ధరను విధించగా.. ఈ సారి రూ.61 లక్షలుగా పేర్కొంది.
కొన్ని సంవత్సరాలుగా ఐపీఎల్ ద్వారా భారత మార్కెట్లో ప్యూమా మంచి ప్రజాదరణ పొందింది. ప్రస్తుతం కేఎల్ రాహుల్తో పాటు, టీమ్ఇండియా కెప్టెన్ విరాట్ కోహ్లీ ఈ సంస్థకు బ్రాండ్ అంబాసిడర్గా వ్యవహరిస్తున్నారు.
